Nâ H’Dung Niê ối a ƀuôn Tơng Jŭ, cheăm Ea Kao, pơlê kong kơdrâm Ƀuôn Ma Thuột, kong pơlê Dak Lak tối: Hdrối nah mơngế kuăn ngo Rơđế kuăn ‘nĕng ôh tá lăm hriâm hên, hâi hlê klâi mê rêm hdroh rơpŏng hngêi ai ngế châi tamo ôh tá djâ lăm pơlât a hngêi pơkeăng, mê hmâ pơlât ƀă pơkeăng hlá loăng tiô djâ pôa hmâ pro ing nah, pơlât ƀă tơdroăng xối vâ rơkâu pâ Xeăng pơlât ăm prêi lĕm. La nôkố hiăng tơ ê:

“Sap ai Đảng, Tơnêi têa tơmâng tŏng kŭm, sap ing ngế cheăng khăm pơlât dêi pơlê troh cheăm, pơlê kong kơdrâm, nôkố hnê tối ‘na vâi kơdrâi ‘na ai kuăn preăng kuăn iâ, ‘nâ hía hnê tung pơla dế mơ-êa thế rak ngăn kuăn ngá  tung klêa krâu tơniăn ivá mo lĕm, đi đo lăm khăm, thế lăm pôu ngế kum pêi hnoăng cheăng ‘na pơkeăng pơlât dêi pơlê vâ châ hnê tối.

Pơreăng COVID-19 tung pơlê pin ai tâ tú pơreăng ki apoăng cho cheăm Ea Kao,  xua veăng tơmâng hnê mơhno khât dêi Đảng, Tơnêi têa hiăng hnê tối nhên, tơkŭm tơmâng hnê mơhno pêi pro kơtăng khât, pơreăng tâ tú tung pơlê hên la ôh tá ai ngế ki râ ó  lơ ngế hlâ, mê cho tơdroăng ki hâk ro tung pơla hdrối nah’’.

Troh nôkố, ƀă tơdroăng kơdo mơ-eăm dêi kơvâ ngăn pơkeăng, kuăn pơlê mâu hdroâng kuăn ngo a kong pơlê Dak Lak hiăng mơdêk hlê plĕng tung tơdroăng rak ngăn ivá, vâ lăm pôu xêh hngêi pơkeăng khăm drêng châi tamo, mâu túa tơlá ton nah môi tiah xối xeăng, krêó pôa pơchâu lăm tôih, lơ pơlât ƀă hlá nhâ hiăng chôa tah lôi. 100% vâi kơdrâi mơhum kuăn ngá a hngêi pơkeăng cheăm, ôh pá ai xếo ngế mơhum kuăn a hngêi. Mâu hngêi pơkeăng cheăm hiăng ai tŭm tơmeăm, pơkeăng khăm pơlât ivá kuăn pơlê  mâu hdroâng kuăn ngo a cheăm.

Ƀok thái pơkeăng Nông Văn Sáng, Ngế pơkuâ hngêi pơkeăng cheăm Ea M’Droh, tơring Čư̆ Mgar, tối:

“Nôkố hiăng ai kơmăi siêu âm, kơmăi khăm ngăn plâi nuih, mâu kơmăi hrik tah têa kơ hêa, kơmăy xét nghiêp cho kơmăi khăm ngăn mơheăm ki hmâ. Drêng tơdroăng khăm ngăn ivá a cheăm dêi pin châ mơdêk tơƀrê, kuăn pơlê ôh tá pá lăm khăm a hơngế vâ  kơdroh kơxô̆ liăn ‘no trêng têa kơxăng rơxế, hlối ôh tá mơdoh hâi chôu, mơngế ki lăm chĕm ngăn ƀăng mâu kơxô̆ liăn hrê ki ê châ kơdroh hên’’.

Ôh tá xê to a Dak Lak, a kong pơlê Lai Châu vâ mơdêk tơƀrê ki tơdâng tơ ‘mô tung hnoăng cheăng khăm pơlât ivá vâ, malối khăm pơlât ăm mâu kuăn pơlê kơpong hngế hngo, kơpong hdroâng kuăn ngo, Đảng ƀă Tơnêi têa hiăng ai luât pơkâ tŏng kum, troăng rơhlâ ki nhên khât môi tiah khu luât pơkâ tŏng kum ƀă tơdroăng tŏng kum khăm pơlât ivá dêi mâu ngế kơtiê, kơpong kơtiê; khu luât pơkâ tŏng kum vâ mơdêk châ achê dêi mơngế kơtiê, châ khăm pơlât ƀă mơ’nui cho khu luât pơkâ kơjo kum liăn ngân ăm mâu kơtiê, kơpong kơtiê  tung khăm, pơlât.

Nâ Lò Thị Khăn, kuăn ngo Lự ối a cheăm Bản Hon, tơring  Tam Đường, tối:

“Rak ngăn ivá vâi kơdrâi mê cho lăm khăm pơla dế mơ-êa, khăm ivá tơná. Vâi nâ o klêi mơhum kuăn, pâk pơkeăng hbrâ mơdât pơreăng. Ôh tá khăm ngăn ivá mê xo ah hmôi xâu tơná lơ ai tơdroăng châi, tâng lơ ai tơdroăng châi ki lâi thế pơlât ngăn hdrối. Á ai ƀaoh hiêm khăm pơlât hlối cho rơpŏng kơtiê mê liăn khăm pơlât ôh tá kơnâ to lâi, ôh tá ai ƀaoh hiêm khăm pơlât mê tâi liăn hên’’.

Tung tơdroăng cheăng tơmâng rak ngăn ivá khăm pơlât ăm hdroâng kuăn ngo ƀă kong ngo nôkố, mâu kong pơlê tơmâng khât troh tơdroăng hnê tối ăm kuăn pơlê hlê ƀă hlối pêi pro tung tơdroăng rak ngăn ivá kâ tŭm trếo kơhiâm ăm ngế nôu ƀă ngế hdrêng; Kơjo kum tung tơdroăng khăm kuăn ngá tung klêa pơla dế mơ-êa khăm tiô rơnó ƀă hlối kơjo kum pơkeăng pơlât hnê ăm vâi kơdrâi hdrối, tung ƀă klêi kơ’nâi mơhum kuăn; Hnê khăm ivá tiô rơnó ăm ngế hdrêng pá xôp 24 khế; hnê mơdêk kâ trếo kơhiâm ƀă hbrâ mơdât hrế krĭn ôh tá păng kân a kơpong hdroâng kuăn ngo ƀă kong ngo ăm vâi hdrêng.

Nâ Bùi Thị Toan, ối a pơlê Lục, cheăm Yến Nghiệp, tơring Lạc Sơn, kong pơlê Hoà Bình ăm ‘nâi:

“A pơlê ngin mâu vâi hdrêng sap 5 hơnăm hiăng pâk rêm khế pâk tro tiô khu pơkuâ pơkâ, vâ tối ivá mâu mâu hiăng kân ai môi tiah vâi kơdrâi ngin hmâ khăm tiô rơnó hlối ăm ôu pơkeăng tah ‘mêa, tâng măng dế mơ-êa châ pâk mơdât pơreăng, pâk kơjo ăm kuăn ngá tung klêa’’.

Tơdroăng khăm pơlât dêi tơnêi têa a kơpong hdroâng kuăn ngo tung mâu hơnăm achê kố hiăng châ tơbleăng pêi pro ƀă pêi hlo tơƀrê, mâu hdroâng kuăn ngo hiăng hlê tung tơdroăng khăm, pơlât, ‘nâi mơhum kuăn a hngêi pơkeăng. Tơdroăng ki mê ăm hlo, môi pâ kơnôm đi đo châ  hnê mơhno tối dêi ing Khu kăn pơkuâ hnê ngăn Đảng, mâu kăn dêi mâu pơlê cheăm hiăng pêi tro tơdroăng hnê hbrâ mơdât pơreăng, rak ngăn ivá kuăn pơlê.

Malối, tơdroăng khăm pơlât ivá kuăn pơlê hdroâng kuăn ngo đi đo châ tơmâng pêi tơƀrê tá hnê mơhno, mơjiâng tơmeăm khoăng, hbrâ mâu tơmeăm, pơkeăng pơkât, tơdroăng pơlât hlo tơƀrê; pakĭng mê, mâu hdroâng kuăn ngo châ tơdah xúa mâu tơmeăm khăm pơlât ki dâi lĕm nếo nôkố. 100% kuăn pơlê kơpong hdroâng kuăn ngo, rơpŏng kơtiê, rơpŏng vâ chê kơtiê châ ăm theh ƀaoh hiêm khăm pơlât.