VOV4.Sêdang - Kơxo lơ 14/5, Khu râ kăn seá ngăn Hô̆i đong tâ phĭu Tơnêi têa xua jâ Võ Thị Ánh Xuân, Kăn cheăng tung Tíu xiâm Đảng, Kăn xiâm phŏ hnê ngăn tơnêi têa, Kăn phŏ hnê ngăn Hô̆i đong tâ phĭu Tơnêi têa pơkuâ djâ, hiăng ai roh séa ngăn tơdroăng tâ phĭu a kong pơlê Lâm Đồng. Troh nôkố, tơdroăng hbrâ tâ phĭu a kong pơlê Lâm Đồng châ pêi pro tro tiô pơkâ ƀă hâi khế pơkâ.

Jâ Võ Thị Ánh Xuân, Kăn xiâm phŏ hnê ngăn tơnêi têa séa ngăn tơdroăng tâ phĭu a Lâm Đồng

Xông tơpui a roh pêi cheăng, jâ Võ Thị Ánh Xuân kheăn kơdeăn tơdroăng hbrâ tâ phĭu tŭm túa dêi kong pơlê Lâm Đồng; tơdrêng amê  kal athế tơtrŏng, Lâm Đồng pơtối thăm pơtâng tối tơdroăng tâ phĭu ‘na troăng trâu hơngế, ki má lối cho tung kơpong hơngế hơngo, kơpong hdroâng kuăn ngo, xing xoăng mâu khu ngế pêi cheăng tung Khu hnê mơhno Vi ƀan tâ phĭu pơxiâm séa ngăn kơpong sap ing hâi kố vâ teăm tơleăng tơdrêng mâu tơdroăng ki ối tơvâ tơvân tâng lơ ai, tơniăn hbrâ tŭm mâu troăng pêi ăm hâi tâ phĭu tơkŭm po tơniăn ƀă tro tiô pơkâ.

A Sa Ly tơplôu ƀă tơbleăng