VOV4.Sêdang - Pơla hdrối kố nah, a tíu pêi cheăng Chin phuh, pôa Trương Hòa Bình, Ngế pro xiâm phŏ hnê ngăn tơnêi têa, kăn hnê mơhno Tơnêi têa tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo hneăng hơnăm 2021 – 2030 pơkuâ po rôh hôp dêi Khu hnê mơhno cheăng. Veăng hôp a hneăng hôp ai pôa Hầu A Lềnh, ngế xiâm pơkuâ Vi ƀan hdroâng kuăn ngo, kăn phŏ pơkuâ mâu khu râ, kơvâ cheăng cho khu ki tơrŭm dêi Khu hnê mơhno cheăng.

Tơdroăng pơkâ pêi pro dêi tơnêi têa ‘na hdroâng kuăn ngo ƀă kong ngo cho 1 tung 3 tơdroăng pơkâ dêi tơnêi têa ƀă pơla sap hơnăm 2021-2025, hiăng châ Kuô̆k hô̆i  kĭ troăng hơlâ ‘no liăn mơjiâng tơmeăm khoăng ƀă kơxô̆ liăn ki mê xo ing mâu hngêi rak liăn xiâm tơnêi têa, ai pơxúa, kal khât ƀă tơdroăng mơnhông cheăng kâ rêh ối dêi tơnêi têa, kum cheăng kâ ƀă pro tơniăn tung rêh ối ăm kuăn pơlê kơpong hdroâng kuăn ngo ƀă kong ngo, cho kơpong ki kơtiê  má môi dêi lâp tơnêi têa.

Xua mê, Ngế pro xiâm phŏ hnê ngăn tơnêi têa thế mâu khu xiâm, kơvâ cheăng  mơdêk hnoăng cheăng pêi, thâ mơjiâng ƀă tơbleăng tơdroăng pơkâ pêi nhên vâ châ tơkŭm pê klêi tơdroăng mê pái khế mơ’nui hơnăm  2021, veăng ‘no hnoăng tăng liăn ngân tơnêi têa vâ mơjiâng tơmeăm khoăng, tơkâ luâ xơpá xua tơjâk pơreăng COVID-19, ‘mâi mơnhông cheăng kâ, tơniăn tung rêh ối.

Tơbleăng ƀă Khu hnê mơhno cheăng, Khu xiâm, Ngế pơkuâ Vi ƀan ngăn kuăn ngo - pôa Hầu A Lềnh ăm ‘nâi,  Vi ƀan dế tơrŭm krá ƀă mâu khu xiâm, kơvâ cheăng hbrâ mâu hồ sơ, hlá mơ-eá chêh tơdroăng cheăng dêi Hô̆i đong mơnhên ngăn dêi Tơnêi têa ai mơnhên hdrối vâ pơtroh ăm  Ngế pro xiâm hnê ngăn Chin phuh kĭ ‘no liăn cheăng tiô tơdroăng pơkâ. Ki kal dêi Tơdroăng mê cho 10 tơdroăng tơkêa pêi pro. Ki xiâm tơdroăng pơkâ tung pơla hơnăm 2021-2025 rế kơdroh ki kơtăn hơngế ‘na tơdroăng rêh ối, pêi cheăng kâ dêi kơpong hdroâng kuăn ngo ƀă kong ngo tâng riân tơchoâm tung lâp tơnêi têa; troh hơnăm 2025  kơdroh tơdế cheăm, thôn, pơlê kơtiê xơpá, troh hơnăm 2030 kô ôh tá ai xếo cheăm, thôn, pơlê ki kơtiê xơpá ó. Tâi tâng kơxô̆ liăn pêi lo pơla kố, ki iâ gá 147 rơtal liăn.

A hneăng hôp, teăng mâ mâu khu râ, kơvâ cheăng ki tơdjâk troh tơkŭm tơpui tơno 'na tơdroăng cheăng pêi ki kal má môi, malối pơla sap nôkố troh mơ’nui hơnăm 2021, tơdroăng cheăng pêi, hnoăng cheăng pêi dêi Ƀơrô xĭng xoăng tơdroăng cheăng a râ xiâm Tơnêi têa, khu ngế ki kum pêi hnoăng cheăng  a mâu kong pơlê pơlê kong kân, luât pơkâ mơhnhôk tăng liăn tơ’nôm (liăn ODA, liăn mơnhông pơlê pơla).

Tơpui mơgêi a hâi pêi cheăng, pôa Trương Hoà Bình, Ngế pro xiâm phŏ hnê ngăn tơnêi têa khĕn kơdeăn Vi ƀan ngăn kuăn ngo ƀă mâu khu xiâm, kơvâ cheăng, mâu ngế tung Khu hnê mơhno cheăng xiâm tơnêi têa hiăng hnê mơhno kơtăng, hnê nhên khât mâu tơdroăng cheăng châ pơcháu tro tiô tơdroăng Pơkâ  pêi.

Laga, Ngế pro xiâm phŏ hnê ngăn tơnêi têa thế Vi ƀan ngăn kuăn ngo hriâm ‘pât ƀă thế rĕng pê klêi  2 tơdroăng ki hiăng lôi ton; hiăng luâ khế hơnăm pơkâ; pakĭng mê, rĕng pơtroh ăm Ngế xiâm hnê mơhno kĭ  Luât pơkâ pêi ƀă Tơdroăng cheăng pêi hơnăm 2021 dêi Khu hnê mơhno cheăng xiâm tơnêi ing tơdroăng ăm hlo xo ing tơdroăng veăng hnê tối dêi mâu khu xiâm, kơvâ cheăng tung khu a hneăng hôp Khu hnê mơhno cheăng chiâm tơnêi têa hâi lơ 22/3/2021.

‘Na mâu tơdroăng cheăng pêi ki xiâm 6 khế mơ’nui hơnăm, Ngế pro xiâm phŏ hnê ngăn tơnêi têa tối nhên, mâu khu xiâm, kơvâ cheăng ki tơdjâk troh thế tơrŭm tro tâ nếo, mơ-eăm pê klêi tâi tâng mâu tơdroăng cheăng hbrâ vâ châ  tơbleăng pêi, tung mê tơkŭm pê klêi luât pơkâ ƀă mâu tơdroăng chêh hnê mơhno pêi pro dêi tơdroăng.

Pôa Trương Hòa Bình, Ngế pro xiâm phŏ hnê ngăn tơnêi têa pơkuâ hneăng hôp

Tơmâng tí tăng ‘nâi plĕng, tối mâu luât pơkâ, troăng hơlâ mơhnhôk pêi, mơhnhôk tăng liăn ing tơnêi têa ƀă pơlê pơla pêi tơdroăng mê. Pakĭng mê, mơdêk tơdroăng cheăng hnê tối, mơhnhôk  kuăn pơlê tơchoâm ivá veăng pêi Tơdroăng mê:

“Tơdroăng ki kal cho pro ti lâi vâ mơdêk hlê plĕng ‘nâi hriăn pêi, ‘nâi mơ-eăm pêi ing ivá tơná kuăn pơlê, ‘nâi tơmiât kơdôu mơ-eăm pêi cheăng, ôh tá kơnôm tơngah to a Tơnêi têa. Pin xiâm pro ăm ro hên ngế rơkê vâ pêi cheăng, mơhnhôk  tăng liăn ‘no mơjiâng tơmeăm khoăng, ăm tơdroăng pơkâ pêi, malối cho  mơngế ai tuăn vâ mơ-eăm  pơxiâm pêi cheăng. Ai luât pơkâ mơhnhôk mâu ngế pêi cheăng, malối mâu hơnăm ối nếo. Xua mê, pin thế ai po lâm hnê cheăng pêi tơtrro tung rơxông pêi cheăng ƀă kơmăi mơkok 4.0, cheăng ƀă kơmăi kơmok ki dâi lĕm”.

Ki xiâm pơkâ pêi dêi Tơdroăng  pơkâ dêi tơnêi têa ‘na mơnhông cheăng kâ - rêh ối pơlê pơla kơpong hdroâng kuăn ngo ƀă kong ngo pơla hơnăm 2021-2030 ƀă kô rế pro kơdroh ăm rế achê ki kơtăn hơngế dêi rơpó ‘na kơlo rêh ối, pêi lo liăn ngân dêi kơpong hdroâng kuăn ngo ƀă kong ngo tâng vâ pơchông ƀă riân tơchoâm lâp tơnêi têa; troh hơnăm 2025 kơdroh 50% kơxô̆ cheăm, thôn, pơlê kơtiê xơpá, troh hơnăm 2030 ôh tá ai cheăm ki lâi, thôn, pơlê ki kơtiê xơpá ó luâ râ.

Tiô pôa Trương Hòa Bình, Ngế pro xiam phŏ hnê ngăn Chin phuh, tung pơla ai pơreăng COVID-19 pơtối tâ tú tơdjâk kân troh tŭm tơdroăng cheăng kâ rêh ối dêi kuăn pơlê, tơdroăng pơkâ dêi tơnêi têa ‘na hdroâng kuăn ngo ƀă kong ngo cho môi tơdroăng cheăng ki kân, hlối veăng ‘no hnoăng tung tơdroăng kal vâ, tăng cheăng pêi, mơnhông pêi chiâk deăng, tê mơdró kâ, hlối pro pơxúa ‘na tơdroăng rêh ối, malối cho ƀă mâu ngế ki ôh tá ai ivá, mâu rơpŏng kơtiê, rơpŏng kơtiê xơpá rêh ối a mâu pơlê cheăm hngế hngo kơtiê xơpá ƀă hía hé.

VOV1

Gương tơplôu ƀă tơbleăng