VOV4.Sêdang - Tơdroăng pơkâ dêi tơnêi têa ‘na mơnhông cheăng kâ – rêh ối kơpong hdroâng kuăn ngo ƀă kong ngo pơla hơnăm 2021-2030 mơ-eăm troh hơnăm 2030 kơdroh 50% to cheăm kơtiê xơpá ƀă kơdroh 70% thôn pơlê kơtiê xơpá tâng vâ pơchông ƀă nôkố. Vâ pêi pro tiô pơkâ mê, pakĭng kơxô̆ liăn tŏng kum dêi Tơnêi têa, tơdroăng mơ-eăm dêi mâu kăn kơvâ cheăng kal kí cho kal thế châ môi tuăn, rơtế veăng ‘no ivá mơno dêi mâu khu râ kuăn pơlê.

Hâi lơ 18/6/2021, Vi ƀan ngăn ‘na hdroâng mơngế tơbleăng Pơkâ kơxô̆ 433/QĐ-UBDT (QĐ 433), kĭ ăm 22.027 thôn ki pá puât, kơpong vâi krâ hdroâng kuăn ngo ƀă kong ngo ối tung 40 kong pơlê, pơlê kong kơdrâm. Kố cho xiâm kối vâ pêi pro mâu troăng hơlâ mơ’no liăn cheăng, tŏng kum mơnhông mơdêk cheăng kâ – rêh ối pơlê pơla ing kơxô̆ liăn ngân tơnêi têa hneăng hơnăm 2021 – 2025.

Pơtối mê, thôn ki pá puât khât cho thôn ai kơxô̆ rơpŏng kơtiê sap ing 20% tơngi klêng (ƀă kơpong Tơbăng kroăng Cửu Long cho sap ing 15% tơngi klêng lơ ai lối 30 rơpŏng hdroâng kuăn ngo kơtiê/thôn). Mâu thôn ai kơxô̆ rơpŏng kơtiê sap ing 15% troh pá kơdâm 20% (ƀă kơpong tơbăng kroăng Cửu Long sap ing 12% troh pá kơdâm 15%), tâng ai lối 60% rơpŏng kơtiê cho rơpŏng hdroâng kuăn ngo tung tâi tâng kơxô̆ rơpŏng kơtiê dêi thôn; tá hâi ai troăng sap ing thôn troh tơdế cheăm lơ ai troăng laga prôk lăm pá puât, ki má lối cho rơnó mêi; tá hâi ai troăng kơxái on tơhrik tơnêi têa lơ hiăng ai laga lối 30% kơxô̆ rơpŏng tá châ xúa on tơhrik tơnêi têa mê châ mơnhên cho thôn ki pá puât khât.

Túa pơkâ pêi krá tâ hneăng hdrối xua mê hneăng hơnăm 2021 – 2025, kơxô̆ thôn ki pá puât păng ‘nâng ối tung kơpong kong ngo kơdroh ó. Tơdroăng ki kố tơdjâk troh tơdroăng pêi pro troăng hơlâ a mâu kong pơlê; tung mê, tơdjâk hlo nhên má môi, rĕng má môi cho a kơvâ khăm pơlât ƀă hnê hriâm.

Ki păng ‘nâng ăm hlo, drêng tơring cheăm tíu kuăn pơlê rêh ối ối tung inâi ki pá puât păng ‘nâng, kuăn pơlê châ ai troăng hơlâ tŏng kum dêi Tơnêi têa tung môi pơla chía ton. Xua mê, drêng ôh tá châ tŏng kum xếo, ai hên kuăn pơlê tâ ôh tá tŭm ƀă rơhêng vâ ‘nâi ‘na tơdroăng pơ’lêh kố.

Pôa Giàng A Sáu, kăn pơkuâ thôn Đồng Ruộng, cheăm Kiên Thành, tơring Trấn Yên, kong pơlê Yên Bái, cho 1 tung mâu thôn lo ing inâi thôn ki pá puât păng ‘nâng tung hneăng la ngiâ tối ‘na pơkâ mơhnhôk kuăn pơlê tung hneăng nếo.

‘’Mơ-eăm pơtâng tối mơhnhôk ăm mâu muăn troh lâm hriâm tŭm, ôh tá ăm kuăn muăn tro lôi pa rŏng. Kơ’nâi mê, pơtâng tối ăm kuăn pơlê rôe theh ƀaoh hiêm khăm pơlât 100%’’.

Thế mơnhên, mâu tơdroăng ki pơ’lêh ‘na cheăm, pơlê pá puât păng ‘nâng tiô Pơkâ 861 ƀă pơlâ 433 mơni kô tơdjâk troh tơdroăng pêi pro troăng hơlâ tŏng kum a pơlê pơla; ki rơhêng vâ tối cho tơdjâk troh hên rơpŏng, ki má lối cho rơpŏng hdroâng kuăn ngo kơtiê. Cheăm, pơlê ki pá puât ai tơdroăng ki pơ’lêh xuân môi tiah tơdjâk troh hên mâu ngế, ki má lối cho hok tro, thái cô, kăn ƀô̆, mơngế pơkuâ, mơngế pêi cheăng kơ koan, mơngế rêh ối ƀă pêi cheăng a kơpong ki pá puât păng ‘nâng. Hok tro ôh tá châ troăng hơlâ tŏng kum tiô dêi mâu rơpŏng hdroâng kuăn ngo kơpong kong ngo, kơpong hơngế hơngo ôh tá tơniăn chiâng tơdjâk troh tơdroăng mơhnhôk hok tro lăm hriâm pá puât, tâk hên tơdroăng ki tơ’lêi hok tro lôi pơtê hriâm ƀă kơdroh kơxô̆ hok tro kơhnâ troh a lâm hriâm, tơdjâk troh ki hôm păng ‘nâng hnê hriâm, hnê tơ’nôm, hnê ăm mâu ngế ôh tá ‘nâi chư, ki rơhêng vâ tối cho ƀă mâu hok tro hngêi hơngế hngêi trung, nôu pâ hok tro ôh tá ai rơxế pơto chiân dêi kuăn lăm hriâm rêm hâi. Laga vâ nôu pâ hok tro ƀă hok tro hlê plĕng ‘na troăng hơlâ nếo dêi tơnêi têa, kơvâ hnê hriâm kong pơlê kố hiăng hbrâ pơkâ mâu troăng. Pôa Đào Anh Tuấn, Phŏ hnê ngăn Khu pơkuâ hnê hriâm ƀă hnê mơjiâng tuăn ngoâ rơkê kong pơlê Yên Bái tối ăm ‘nâi:

‘’Khu hiăng pơkuâ, tơrŭm ƀă mâu kơ koan ki tơdjâk, mâu tơring vâ thăm pơtâng tối, mơhnhôk hok tro hriâm. Khu hiăng mơjiâng pơkâ pêi, mơhnhôk tơdroăng kum dêi pó tung tâi tâng kơvâ cheăng, vâ kum mâu hok tro kơpong hdroâng kuăn ngo, kơpong hdroâng kuăn ngo ai liăn  mơnhông cheăng kâ – rêh ối pơlê pơla pá puât ƀă troăng pêi cho ‘’hngêi trung kum hngêi trung, lâm kum lâm, hok tro kơpong ai liăn ngân tơdroăng rêh ối tơ’lêi hlâu kum hok tro ai tơdroăng rêh ối pá puât’’. Tơkŭm séa ngăn mâu ngế ki ôh tá châ xúa troăng hơlâ tŏng kum xua mâu cheăm, thôn hiăng châ lo kơpong ki pá puât, vâ mơhnhôk mâu khu râ tiô troăng hơlâ kum pơlê pơla, tŏng kum mâu vâi o hok tro ai tơdroăng rêh ối pá puât, xing xoăng ăm mâu hok tro a hơngế hngêi trung laga ôh tá kâi vâ vêh tung hâi mê laga ôh tá châ kum mâu troăng hơlâ mê kô pơtối châ ối a mâu hngêi ăm hok tro pơtê kơhâi dế dêi hngêi trung’’.

Rêm ngế kuăn pơlê kal hlê plĕng nhên, tơdroăng cheăng kâ – rêh ối pơlê pơla rế hía rế mơnhông mơdêk, tơdroăng rêh ối kế tơmeăm khoăng, hiâm mơno châ mơdêk rơtế ƀă tơdroăng mâu troăng hơlâ tŏng kum dêi Tơnêi têa kô kơdroh. Vâ pêi pro tơdroăng pói vâ mơ-eăm pro kro mơdrŏng mê ôh tá chiâng djâ hiâm mơno tơmiât ‘’xêo kro mơdrŏng’’ mê thế khŏm mơ-eăm, mơ-eăm xêh, hâk vâ xông tơtêk.

Ƀă khu râ kăn pơkuâ ƀă khu kăn ƀô̆, khu kăn pơkuâ a pơlê cheăm, ki má lối cho mâu pơlê cheăm tro tơdjâk dêi troăng hơlâ tŏng kum, ôh tá ai tơdroăng ki ki tối pá puât, bu ai khŏm mơ-eăm pêi. Rơtế ƀă mê, mâu tơring, cheăm thế hbrâ xêh, tơmiât pêi rơkê tung mơhnhôk, pêi pro tơdrêng ƀă mâu tơdroăng ki ê, xua châ tơ-ƀrê kơxô̆ liăn mơ’no cheăng ăm tơdroăng kơdroh kơtiê, tơtrŏng pêi tơtro tơdroăng hnê mơjiâng cheăng pêi, tăng cheăng pêi ăm kuăn pơlê, po rơdâ tơdroăng tăng cheăng pêi, mơdêk pêi lo liăn ăm mơngế pêi cheăng tung pơlê, cheăm vâ kuăn pơlê ôh tá tô tuăn, tô tuăn drêng tro tơdjâk xua troăng hơlâ tŏng kum.

Tơdroăng ki veăng pôu râng hnoăng cheăng dêi khu râ kăn pơkuâ, rơtế tơdroăng tơdjuôm ivá, môi hiâm mơno dêi mâu râ kuăn pơlê kô pro ăm kơxô̆ liăn mơ’no cheăng, tŏng kum dêi hngêi arak liăn Tơnêi têa mơnhông châ tơ-ƀrê. Vâ ing mê, kơpong vâi krâ hdroâng kuăn ngo ƀă kong ngo ‘’ôh tá tro lôi parŏng’’, rơtế ƀă lâp tơnêi têa châ pơkâ pêi la ngiâ dêi Pơkâ hneăng hôp má XIII dêi Đảng cho djâ tơnêi têa pin chiâng tơnêi têa mơnhông mơdêk pêi lo liăn hên a hơnăm 2045./.

VOV4 chêh

A Sa Ly tơplôu ƀă tơbleăng