VOV4.Sêdang - Sap ing hâi lơ 5 troh lơ 11/5, Vi ƀan xiâm Măt trâ̆n Tơnêi têa Việt Nam kong pơlê Khánh Hòa tơkŭm po Rôh hôp trâm mâ kuăn pơlê mơhnhôk tâ phĭu ƀă mâu ngế ki tơbriât vâ pro kăn cheăng tung Kuô̆k hô̆i hneăng má 15 hơnăm 2021 – 2026. Pôa Trần Tuấn Anh, kăn pơkuâ Khu kăn cheăng kâ Tơnêi têa veăng hôp a hneăng hôp a Tíu tâ phĭu pôk kăn kơxô̆ 1, mê cho cheăm Ninh Hòa ƀă tơring Vạn Ninh, kong pơlê Khánh Hòa.

Tung mâu rôh trâm mâ kuăn pơlê mơhnhôk tâ phĭu, pôa Trần Tuấn Anh hiăng tối mâu tơdroăng ki kal tung hnoăng pêi pro dêi tơná. Ai mâu hnoăng cheăng ki kal châ pôa Trần Tuấn Anh mơnhên, cho: Séa ngăn mâu tíu pêi cheăng a tơring, cheăm, tơrŭm krá ƀă kuăn pơlê, hmâng tơdroăng ki tối ki ai khât tung tơdroăng rêh ối dêi kuăn pơlê ƀă kh mơdró kâ vâ hriăn ngăn, tí tăng ‘nâi plĕng, pơkâ mơ’no ăm Tơnêi têa mơjiâng troăng hơlâ, pơkâ ki kân xua ki pơxúa dêi tơnêi têa, dêi hdroâng mơngế, xua kuăn pơlê.

Xua kuăn pơlê pro xiâm ƀă cho hnoăng cheăng, troăng hơlâ mơnhông cheăng kâ - rêh ối pơlê pơla tối a tơdroăng pơkâ Hneăng hôp khu kăn rôh má 18 dêi Đảng ƀô̆ kong pơlê Khánh Hòa, ƀă tơdroăng ki xiâm ăm cheăng kâ dêi kong pơlê Khánh Hòa châ mơnhông rĕng, krá tơniăn.

Katarina Nga tơplôu ƀă tơbleăng