VOV4.Sêdang - Kơxê lơ 2/6, a tíu pêi cheăng Chin phuh, pơkuâ hôp mơ’no tơdrêng tung um tơvi pơla Khu pơkuâ Hnê mơhno cheăng tơnei têa ‘na hbrâ mơdât pơreăng COVID-19 ƀă Khu xiâm ngăn pơkeăng pơlât ƀă Viện Pasteurs Pơlê kong kân Hồ Chí Minh, pôa Vũ Đức Đam, Ngế pro xiâm phŏ hnê ngăn tơnêi têa, Ngế pơkuâ hnê mơhno cheăng dêi tơnêi têa thế Pơlê kong kân Hồ Chí Minh pơtối khăm ngăn mơheăm séa ngăn tung kuăn pơlê, xo mơheăm ngăn vâ ‘nâi a mâu kơpong ki rơ-iô, thăm nếo xúa rơbot ki chiâng krếo xêh phôn kơ-êng ivá kuăn pơlê ăm kuăn pơlê tối tơbleăng inâi tíu ối tơná ăm khu ngăn pơkeăng, ing mê, lăm troh tơrêm hngêi pâk xo mơheăm vâ ngăn mâu ngế ki tung châ ai tơdroăng châi lơ nhôm tơ’lêi tâ tú tâ.

Tơmâng xo tơdroăng  ki pêi pro tung hbrâ mơdât pơreăng dêi Pơlê kong kân Hồ Chí Minh, pôa Vũ Đức Đam, Ngế pro xiâm phŏ hnê ngăn tơnêi têa thế kơ koan pơkuâ cheăng dêi Khu hnê mơhno cheăng pơlê kong kân pơtối khăm ngăn mơheăm séa ngăn vâ châ ‘nâi tơ’nôm mâu tíu ki ai pơreăng tung kuăn pơlê. Pôa Vũ Đức Đam tối pơchân, mâu kăn pơlê kong kân, drêng hlo ai pơreăng tâ tú nếo tung kơpong cheăng ƀă kơmăi kơmok, tơdroăng tơkŭm hdró kơpong, klâ krê thế pêi pro nhên kơtăng, tro tiô khoa hok, ví lơ châ tâ tú ăm mâu ki ê nếo.

Gương tơplôu ƀă tơbleăng