VOV4.Sêdang - Kơxê lơ 24/3, pôa Dương Văn Trang – Kăn cheăng tung Tíu xiâm Đảng, Kăn pơkuâ hnê ngăn cheăng Đảng kong pơlê Kon Tum pơkuâ roh pêi cheăng ƀă Khu tê mơdró hơnăm ối nếo kong pơlê. Châ mơjiâng sap khế 12/2020, Khu pơkuâ mơngế mơdró hơnăm ối nếo kong pơlê Kon Tum nôkố ai 154 ngế ƀă 10 chi hô̆i, 11 kâu lăk ƀô̆. Mâu chi hô̆i, kâu lăk ƀô̆ hiăng xúa châ tơƀrê kế tơmeăm khoăng ki ai hlâu, păn châ tơƀrê kơxêt; pêt, uâ mơdiê, tê châ tơƀrê priât teâng veâng; uâ mơdiê ƀă tê mâu tơmeăm ing kơphế; mơjiâng pro mâu tơmeăm ki tơbâ ki phá tơ-ê. Khu pơkuâ mơngế tê mơdró hơnăm ối nếo Kon Tum xuân hiăng tơkŭm po hên tơdroăng tŏng kum rêh ối pơlê pơla, tŏng kum mâu ngế ai tơdroăng rêh ối pá puât ƀă tâi tâng kơxô̆ liăn lối 160 rơtuh liăn.

Kăn pơkuâ hnê ngăn cheăng Đảng kong pơlê Kon Tum xông tơpui a roh pêi cheăng

Xông tơpui a roh pêi cheăng, Kăn pơkuâ hnê ngăn cheăng Đảng kong pơlê Kon Tum loi tơngah mâu ngế tê mơdró, khu tê  mơdró hơnăm ối nếo kô ti tăng hlo troăng prôk nếo vâ pêi pro tơtro 2 tơmeăm ki ai hlâu dêi kong pơlê: ôm hyô ƀă loăng pơkeăng.

Tung la ngiâ, mâu khu tê mơdró kal mơ-eăm po rơdâ tê mơdró, thăm tơrŭm ƀă khu tê mơdró kong pơlê pú hmâ vâ mơdêk cheăng kơmăi kơmok uâ mơdiê, ki má lối cho uâ mơdiê sâm kơxái, tơmeăm pêi lo ing chiâk deăng troh tê ngi kong têa ê, mơjiâng tơmeăm ki phá tơ-ê dêi Kon Tum.

A Sa Ly tơplôu ƀă tơbleăng