VOV4.Sêdang - Tung hâi ki apoăng lo lăm pêi cheăng lăm pơtrui, hbrâ mơdât, pơkâ tơleăng mâu ngế ki pro xôi tiô pơkâ “Ngế ki vê rơxế a troăng tâng tung châ hiăng ai trếo ma tŭi, pro xôi tơdroăng ki hiăng ôu drôu ƀiêr drêng vê rơxế”, khu kăn sat gak troăng prôk lâp tơnêi têa châ hlo, pơxâu phak lối  600 ngế pro xôi ôu drôu ƀiê̆r, pak chik trếo ma tŭi.

Hâi lơ 15/3, lâp tơnêi ai 24 ngế tơklâm rơxế a troăng prôk, pro 8 ngế hlâ, tro rong 20 ngế. Tơklâm rơxế a troăng rơxế lơ treng, troăng plong tuk ôh tá ai. Hâi apoăng lo lăm pêi cheăng pơkâ tơleăng mâu ngế ki pro xôi 'na trếo al-kôl, ma tŭi, khu lêng kăn sat gak troăng prôk lâp tơnêi têa hiăng châ 'nâi, pơkâ tơleăng 7 rơpâu 388 ngế pro xôi luât vâ rak tơniăn troăng prôk, phak liăn lối 7 rơtal, tung mê, ai 604 ngế pro xôi luât cho hiăng ôu drôu ƀiê̆r, 2 ngế dương tĭnh ƀă ma tŭi.

Katarina Nga tơplôu ƀă tơbleăng