VOV4.Sêdang -  Tung tơdroăng pêi cheăng a mâu kong pơlê peăng mâ hâi lo pá kơnhŏng tơnêi têa, hâi lơ 5/5, pôa Vương Đình Huệ, Kăn xiâm hnê ngăn Kuô̆k hô̆i, Kăn xiâm hnê ngăn Hô̆i đong tâ phĭu Tơnêi têa rơtế khu râ kăn pêi cheăng dêi Kuô̆k hô̆i hiăng séa ngăn tơdroăng hbrâ tâ phĭu rah xo kăn teăng mâ Kuô̆k hô̆i hneăng má XV, Kăn teăng mâ Hô̆i đong kuăn pơlê mâu râ hneăng hơnăm 2021 – 2026 a kơpong tâ phĭu kơxô̆ 4, thôn Thèn Pả, cheăm Lũng Cú, tơring Đồng Văn ƀă pêi cheăng ƀă khu râ kăn pơkuâ kong pơlê, Vi ƀan tâ phĭu kong pơlê Hà Giang; lăm pôu, mơhnhôk kăn ƀô̆ Đông mô đô̆i Lũng Cú.

Xông tơpui a roh pêi cheăng, pôa Vương Đình Huệ pơchân tối kong pơlê Hà Giang, drêng hbrâ tơdroăng tâ phĭu, laga xuân thế rak ngăn mơnhông cheăng kâ, rêh ối pơlê pơla, rak tơniăn cheăng lêng gak kring, kum tơdroăng rêh ối pơlê pơla. Tung tơdroăng tơkŭm po vâ ngế tơbriât to pro kăn trâm mâ kuăn pơlê, pôa Vương Đình Huệ pơchân tối, mâu ngế tơbriât to pro kăn teăng mâ Kuô̆k hô̆i a râ xiâm mê lăm tơbriât to pro kăn a kong pơlê, tung 1 – 2 hâi la ngiâ, khăm ngăn ivá ahdrối trâm mâ kuăn pơlê, tơniăn tung tơdroăng hbrâ mơdât pơreăng.

A Sa Ly tơplôu ƀă tơbleăng