VOV4.Sêadng - Kơxê lơ 13/4, pôa Vương Đình Huệ, Kăn xiâm hnê ngăn Kuô̆k hô̆i, Kăn hnê ngăn Hô̆i đong tâ phĭu tơnêi têa rơtế khu râ kăn séa ngăn dêi Vi ƀan pơkuâ Kuô̆k hô̆i, Hô̆i đong tâ phĭu tơnêi têa pêi cheăng ƀă Khu pơkuâ cheăng Đảng pơlê kong kân, Vi ƀan tâ phĭu pơlê kong kân Hải Phòng.

Xông tơpui a roh pêi cheăng, pôa Vương Đình Huệ tối, Hải Phòng cho tíu pêi cheăng apoăng lăm séa ngăn drêng pôu râng hnoăng cheăng nếo, xua kố cho môi tung mâu pơlê kong kân pêi pro tơtro  tơdroăng tâ phĭu vâ tơpui tơno, séa ngăn túa ki rơkê tơtro vâ ai mâu  tơdroăng mơnhên tơdjuôm tung lâp tơnêi têa.

Pôa Vương Đình Huệ pơkâ thế, tung la ngiâ, Pơlê kong kân Hải Phòng pơtối hlê plĕng trâu hơngế pơkâ xiâm, mâu tơdroăng ki pơxúa dêi roh tâ phĭu roh kố; hriăn plĕng troăng rah xo mâu ngế pêi cheăng Hô̆i đong mâu râ ƀă xing xoăng tơdroăng cheăng inhên ăm rêm ngế krê klêi kơ’nâi pêi tŭm tâi tâng. Hô̆i đong tâ phĭu kal ai troăng phôn tơleăng mâu troăng ki ôh tá tro vâ teăm tơdrêng tung tâ phĭu rah xo kăn.

A Sa Ly tơplôu ƀă tơbleăng