VOV4.Xơ Đăng - Kơxê măng lơ 3/12, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i pơkuâ roh hôp pêi cheăng ƀă Khu hnê mơhno má môi Vi ƀan pơlê pơla ƀă mâu kơ koan ki tơdjâk ‘na tơdroăng Chin phuh tơbleăng Vi ƀan hnê mơhno má môi ăm phêp pêi pro mâu pơkâ pêi, troăng hơlâ ki má môi, ki ôh tá tiô tiah hmâ, ki phá tơ-ê tung hbrâ, mơdât pơreăng COVID-19 vâ pêi pro Troăng pêi ton xŏn tŭm têk ‘na hbrâ, mơdât pơreăng COVID-19. Xông tơpui a roh hôp, mâu rơkong veăng tơpui tối nhên tung rêm troăng hơlâ. ‘Na mơngế pêi cheăng veăng pâk pơkeăng, khăm ngăn, rak ngăn, pơlât mơngế tro tâ COVID-19, Chin phuh kal kơnó ‘nhên, tíu khăm pơlât, hngêi pơkeăng, tíu tơdah pơlât.

Tâ tá hneăng hôp

Pôa Vương Đình Huệ, Kăn xiâm hnê ngăn Kuô̆k hô̆i tối nhên, tơdroăng ki kal tơbleăng Pơkâ dêi Vi ƀan pơkuâ Kuô̆k hô̆i ăm phêp pêi pro mâu troăng pơkâ pêi, troăng hơlâ ki má môi, ki ôh tá tiô tiah hmâ, ki phá tơ-ê vâ Chin phuh tơbleăng ăm pêi pro ƀă po rơdâ Troăng pêi tŭm têk ‘na hbrâ, mơdât pơreăng COVID-19. Laga ối tung tơdroăng pơ’lêh dêi tơdroăng tơkêa bro Pơkâ kố bu tơkŭm pơkâ mâu troăng pơkâ pêi, troăng hơlâ ki má môi, ki ôh tá tiô tiah hmâ, ki phá tơ-ê ‘na hbrâ mơdât pơreăng COVID-19 ki ê ƀă pơkâ dêi luât lơ tá hâi châ luât nôkố pơkâ.

A Sa Ly tơplôu ƀă tơbleăng