VOV4.Sêdang - Kơxo lơ 24/3, a Hngêi pêi cheăng Kuô̆k hô̆i hiăng po leh pơxiâm po rôh hôp má 11, Kuô̆k hô̆i hneăng 14. Tơpui a hâi pơxiâm hôp, jâ Nguyễn Thị Kim Ngân, Kăn xiâm hnê ngăn Kuô̆k hô̆i tối nhên, kố cho rôh hôp tâi tâng cho tíu tơdjêp, veăng hnê tối ‘na tơdroăng pơcháu hnoăng cheăng dêi mâu kơ koan tung khu kăn xiâm tơnêi têa.

Kăn xiâm hnê ngăn Kuô̆k hô̆i tơbleăng a hâi pơxiâm po rôh hôp má 11 dêi Kuô̆k hô̆i

Jâ Nguyễn Thị Kim Ngân, Kăn xiâm hnê ngăn Kuô̆k hô̆i tối nhên, a rôh hôp drêng kố, Kuô̆k hô̆i kô pêi cheăng môi tiah, mơdoh chôu ăm tơpui hên, tối mâu tơdroăng cheăng hneăng má 14 dêi Kuô̆k hô̆i; seá ngăn tơbleăng mâu tơdroăng cheăng hneăng 2016-2021 dêi: Kăn xiâm hnê ngăn tơnêi têa, Vi ƀan pơkuâ cheăng Kuô̆k hô̆i, Chin phuh, Hô̆i đong ngăn Kuăn ngo, mâu Vi ƀan Kuô̆k hô̆i, Hngêi tơleăng xiâm, Tíu  xiâm seá ngăn arak luât, Tíu xiâm riân ngăn liăn tơnêi têa.

Ing mê, séa ngăn nếo, tối tơbleăng tơdroăng pơkâ ‘na tâi tâng mâu tơdroăng cheăng dêi mâu kơ koan tung khu kăn xiâm tơnêi têa hneăng hơnăm 2016-2021.

Gương tơplôu ƀă tơbleăng