VOV4.Sêdang - Kơxê hâi lơ 14/5, a Hngêi kân Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng tơdah pôa Chay Navuth, Kăn teăng mâ kong têa Kul, pôa Yamada Takio, Kăn teăng mâ kong têa Nhuk lăm pôu, tơpui tơno. A chôu phut tơdah pôa Chay Navuth, Kăn teăng mâ kong têa Kul, pôa Vương Đình Huệ, Kăn xiâm hnê ngăn Kuô̆k hô̆i vêh mơnhên tối, Việt Nam đi đo nhoăm ƀă kơjo kum kân khât ăm tơdroăng ‘mâi mơnhông ƀă thăm mơdêk tơrŭm cheăng ƀă kong têa Kul. Pôa Chay Navuth loi tơngah, ƀă tơdroăng ki hbrâ rơnáu ing tơdroăng pêi pro ki tơtro tiah nôkố, Việt Nam kô tơkŭm po ƀlêi chiâng hneăng tâ phĭu rah xo kăn Kuô̆k hô̆i hneăng 15 ƀă kăn Hô̆i đong hnê ngăn kuăn pơlê rêm râ hneăng 2021-2026 a hâi lơ 23/5 la ngiâ.

Tơdah pôa Yamada Takio, Kăn teăng mâ kong têa Nhuk, pôa Vương Đình Huệ vêh mơnhên tối Việt Nam đi đo ngăn kong têa Nhuk cho pú hmâ ki tơrŭm cheăng kâ má môi, ton xŏn la ngiâ; veăng vâ môi tuăn ƀă Nhuk hiăng ai hnoăng cheăng kơhnâ khât ăm tơdroăng pro hơniâp lĕm ƀă mơnhông dêi kơpong ƀă tung lâp plâi tơnêi. Pôa Vương Đình Huệ pói tơngah Nhuk kô pơtối tong kum ăm vaccine, rơtế tơrŭm ƀă Việt Nam mơjiâng khu pơkeăng vaccine ki hbrâ tơplâ mơdât pơreăng COVID-19.

Nhat Lisa tơplôu ƀă tơbleăng