VOV4.Sêdang - Kơxê lơ 7/6, a Hngêi hôp Kuô̆k hô̆i, pôa Vương Đình Huệ, kăn xiâm hnê ngăn Kuô̆k hiăng ai rôh tơpui phôn ‘no tơdrêng tung um tơvi ƀă pôa Tony Amith, Kăn xiâm hnê ngăn Kuô̆k hô̆i râ má 2 Australia. A rôh tơpui phôn, péa ngế kăn xiâm pơkuâ pơrá tối nhên, tơrŭm cheăng tung la ngiâ pơla péa tơnêi têa mơnhông rế hía rế loi tơngah, ai pơxúa ƀă rế trâu hơngế.

Tung pơla ai pơreăng kân COVID-19 ôh tá tơniăn, rơ-iô sap ing hơnăm nah troh nôkố, la péa pâ xuân ối rak vế tơpui tơno, trâm mâ đi đo. Péa pâ pơtối rak vế tơdroăng ki pơtroh mâu khu kăn troh a tơnêi têa dêi rơpó, tơbleăng tơdroăng ki hlê plĕng tung mâu kơvâ cheăng Kuô̆k hô̆i, mơdêk ki hlê plĕng ƀă tơrŭm krá tâ pơla péa pâ, tơdrêng amê hnối pêi pro kơhnâ tơrŭm môi tuăn tŏng kum dêi rơpó a mâu rôh hôp Kuô̆k hô̆i ki hên kơvâ cheăng.

Katarina Nga tơplôu ƀă tơbleăng