VOV4.Sêdang - Pêi pro tơdroăng trâm mâ kuăn pơlê ahdrối tâ phĭu tiô Luât tâ phĭu rah xo kăn teăng mâ Kuô̆k hô̆i ƀă kăn teăng mâ Hô̆i đong kuăn pơlê, hâi lơ 9/5, pôa Vương Đình Huệ, Kăn xiâm hnê ngăn Kuô̆k hô̆i hiăng tơkŭm trâm mâ kuăn pơlê a tơring Vĩnh Bảo, An Lão dêi pơlê kong kân Hải Phòng vâ tối tơdroăng pêi pro dêi tơná a ngiâ kuăn pơlê.

A roh trâm mâ kuăn pơlê, Kăn xiâm hnê ngăn Kuô̆k hô̆i tối, mơjiâng luât thế tơmâng rơkong tơpui dêi kuăn pơlê, troăng hơlâ tơtro hiâm mơno kuăn pơlê. Tâng ối tung hngêi vâ mơjiâng luât ƀă pơkâ, mê kô ôh tá tơtro păng ‘nâng ƀă tơdroăng rêh ối nốkố, ôh tá tơmâng kuăn pơlê tơpui ki klâi, tơmâng mâu tơdroăng ki ai khât ‘na tơdroăng rêh ối nôkố gá tiah lâi.

‘Na tơdroăng mơjiâng thôn pơlê nếo, kăn xiâm hnê ngăn Kuô̆k hô̆i tối ăm ‘nâi, tung la ngiâ, kô tơbleăng mơnhên túa pêi hneăng hơnăm 2021 – 2025. Tiô tối hdrối hneăng hôp má 2, Kuô̆k hô̆i hneăng má XV kô hôp tơpui tơno ‘na tơdroăng kố, ki rơhêng vâ tối cho ‘na túa pơkâ pêi, tơbleăng ăm pêi pro troăng pêi ki tơdjuôm kơ’nâi mê xing xoăng ăm mâu kong pơlê pêi pro.

A Sa Ly tơplôu ƀă tơbleăng