VOV4.Sedang - Kơxê lơ 15/4, a Hngêi Kuô̆k hô̆i tơkŭm po Hneăng hôp dêi Vi ƀan pơkuâ Kuô̆k hô̆i ƀă mâu kăn teăng mâ pơkuâ a Tơnêi têa. Kố cho hneăng hôp ki apoăng dêi Vi ƀan pơkuâ trâm kăn teăng mâ Kuô̆k hô̆i pơkuâ klêi kơ’nâi rah xo tŭm mâu kăn pêi cheăng. Pôa Vương Đình Huệ, Kăn xiâm hnê ngăn Kuô̆k hô̆i tối nhên, a tơdroăng tơkêa bro Pơkâ tơbleăng a hneăng hôp má 11, Kuô̆k hô̆i hneăng má 14 ‘na  tơdroăng pêi cheăng hneăng hơnăm 2016 – 2021 dêi Kuô̆k hô̆i, ai 8  tơdroăng xiâm ki Kuô̆k hô̆i hneăng má 15 kal pêi pro, rak tơniăn Kuô̆k hô̆i châ khât cho kơ koan teăng mâ kân má môi dêi kuăn pơlê.

Vi ƀan pơkuâ dêi Kuô̆k hô̆i nhuô̆m khât, pơtối tơmâng mâu rơkong tơpui dêi mâu kăn teăng mâ Kuô̆k hô̆i pơkuâ, veăng tơpui ăm  tơdroăng hơ’leh nếo, mơdêk tâ mê nếo ki hôm, châ tơƀrê tơdroăng pêi cheăng dêi Kuô̆k hô̆i. Tung la ngiâ, Kuô̆k hô̆i kô mơjiâng tơdroăng pêi cheăng vâ pêi pro Pơkâ Hneăng hôp roh má 13 dêi Đảng.

Tung mê, kô pêi pro rêm tơdroăng tơkêa bro phá tơ-e, ƀă tơdroăng ki tơrŭm, veăng dêi mâu kơ koan pơkuâ ƀă hâi khế inhên. Tung la ngiâ, khu râ kăn pơkuâ Kuô̆k hô̆i kô ai hâi khế i nhên ƀă Hô̆i đong hdroâng mơngế, rêm Vi ƀan, kơ koan dêi Kuô̆k hô̆i mơjiâng pơkâ, tơbleăng pơkâ tơmiât troăng ‘na mơjiâng luât tung hneăng la ngiâ.

A Sa Ly tơplôu ƀă tơbleăng