VOV4.Sêdang - Kơxo lơ 12/4, a Hà Nội tơkŭm po Hneăng hôp tơbleăng pơkâ dêi Kuô̆k hô̆i ‘na rah xo kăn xiâm xêo ngăn kế tơmeăm khoăng tơnêi têa hneăng hơnăm 2016 – 2021 ƀă pơcháu hnoăng pêi cheăng dêi Kơ koan xiâm xêo kế tơmeăm khoăng tơnêi têa. Teăng mâ khu râ kăn pơkuâ Đảng khu râ kăn Kuô̆k hô̆i, Vi ƀan pơkuâ Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i rơkâu pôa Trần Sỹ Thanh, Kăn xiâm xêo kế tơmeăm khoăng tơnêi têa châ Kuô̆k hô̆i rah xo ƀă kơxô̆ phĭu hên.

Pôa Vương Đình Huệ loi tơngah, pôa Trần Sỹ Thanh rơtế ƀă mâu kăn pêi cheăng tung Đảng, Đảng ủy ƀă kơ koan xêo kế tơmeăm khoăng tơnêi têa pơtối pơkuâ hnê mơhno khu xiâm xêo kế tơmeăm khoăng tơnêi têa pêi pro hnoăng cheăng ki kân hiăng châ pơkâ.

Pôa Vương Đình Huệ tối nhên, Khu xiâm xêo kế tơmeăm khoăng tơnêi têa kal thăm tơrŭm krá tơniăn ƀă mâu kơ koan cheăng tung tơdroăng séa ngăn, pơxâu phak mâu ngế ki pro xôi, mơdêk châ tơƀrê tung hbrâ mơdât kâ kơhveăm liăn ngân, mơ’nhê tê kơtê, pơxâu phak kơtăng mâu ngế pro xôi, ôh tá tro tung tơdroăng xêo kế tơmeăm khoăng xuân môi tiah tung tơdroăng pơkuâ, xúa kế tơmeăm khoăng dêi tơnêi têa.

A Sa Ly tơplôu ƀă tơbleăng