VOV4.Sedang - Klăng leh tơbâ 131 hơnăm hâi kot mâ Pôa Hồ Chí Minh, Kăn xiâm hnê ngăn tơnêi têa hneăng apoăng, 110 hơnăm Pôa Hồ lăm a kong têa ê ti tăng troăng tŏng kum tơnêi têa (05/6/1911 – 05/6/2021), kơxo hâi lơ 20/5, a mâu tíu tơbâ tơmeăm khoăng roh nah a tơring Hóc Môn, Pơlê kong kân Hồ Chí Minh, pôa Nguyễn Xuân Phúc, Kăn xiâm hnê ngăn tơnêi têa pleăng hơvĭng reăng, chôu nhâng tơbâ Pôa Hồ Chí Minh, Kăn xiâm hnê ngăn tơnêi têa hneăng apoăng; pleăng hơvĭng  reăng, chôu nhâng tơbâ mâu ngế khên tơnôu tung tơplâ xâ nah, tung mê, ai pôa Nguyễn Văn Cừ, Kăn xiâm pơkuâ hnê ngăn Đảng hneăng hdrối, pôa Hà Huy Tập, Kăn xiâm pơkuâ hnê ngăn Đảng hneăng hdrối.

Tơring Hóc Môn châ lâp tơnêi têa ‘nâi troh ƀă roh xông tơplâ 18 thôn Vườn Trầu a hơnăm 1885 ƀă Hóc Môn cho tíu châ Khu xiâm Đảng rah xo đông ki pơkí vâ po hên hneăng hôp ki kal hnê mơhno tơdroăng pêi cheăng kăch măng lâp tơnêi têa rơxông 1936 – 1939.

A Tíu koh tơbâ Ngã Ba Giồng tung tíu chôu ‘măn tơmeăm khoăng ton nah râ tơnêi têa Ngã Ba Giồng, pôa Nguyễn Xuân Phúc rơtế khu râ chôu nhâng, pleăng hơvĭng reăng, kon ko a um Pôa Hồ Chí Minh, kăn pơkuâ ki rơkê dêi hdroâng mơngế Việt Nam. Xuân tung kơxo lơ 20/5, a cheăm Tân Thới Thượng, tơring Hóc Môn, pôa Nguyễn Xuân Phúc hiăng lăm pôu, diâp kơxuô tơmeăm ăm mâu rơpŏng ai hnoăng tơnêi têa.

A Sa Ly tơplôu ƀă tơbleăng