VOV4.Sêdang - Hâi lơ 30/5, pôa Nguyễn Xuân Phúc, Kăn xiâm hnê ngăn tơnêi têa hiăng pơtroh kơthô ăm pôa Joe Biden, Kăn xiâm pơkuâ kong têa Mih tơpui ‘na tơdroăng tơrŭm cheăng pơla péa tơnêi têa, malối cho mơdêk tơrŭm cheăng hbrâ ví pơreăng COVID-19. Tung kơthô, Kăn xiâm hnê ngăn tơnêi têa hâk vâ ƀă mơnê kơ Mih hiăng veăng tơlo hên drêng tơhrâ tŏng kum 4 rơtal dollars ăm tơdroăng hriă  plĕng dêi Grup pơkuâ tung lâp plâi tơnêi ‘na vaccine COVID-19 (COVAX) ƀă tơbleăng ăm pôa Joe Biden ‘nâi tơdroăng Việt Nam hiăng xo 2 rôh vaccine ƀă dâng 2,5 rơtuh klŏng ing tơdroăng hriăn plĕng mê.

Pôa Nguyễn Xuân Phúc, Kăn xiâm hnê ngăn tơnêi têa

Pôa Nguyễn Xuân Phúc, Kăn xiâm hnê ngăn tơnêi têa púi vâ Mih pơtối veăng kum Việt Nam ƀă mâu kong têa ‘na xiâm kum vaccine, hlối thế péa pâ mơdêk tơrŭm tí tăng hriăn plĕng ‘na mơjiâng pro ƀa xúa kơmăi kơmok pro vaccine mơdât pơreăng COVID-19. Kăn xiâm hnê ngăn tơnêi têa tối, Việt Nam đi đo nhoăm tơdroăng tơrŭm cheăng, tung tâi tâng ƀă Mih ƀă loi khât tiah kố ing tơdroăng tơrŭm cheăng, tơrŭm tơpui kâ, péa pâ kô pơtối mơdêk tơrŭm cheăng pơla péa pâ rế trâu rơdâ tâ, krá kâk tâ, pro pơxúa ăm kuăn pơlê péa tơnêi têa veăng ‘no hnoăng pơtối kring vế hơniâp lĕm, tơniăn, tơrŭm ƀă mơnhông tơ-ƀrê a kơpong ƀă lâp plâi tơnêi.

Gương tơplôu ƀă tơbleăng