VOV4.Sêdang - Drêng tơbâ 80 hơnăm Hâi mơjiâng Đội Thiếu niên Tiền phong Hồ Chí Minh (15/5/1941-15/5/2021) ƀă Hâi lâp plâi tơnêi vâi hdrêng lơ 1/6, pôa Nguyễn Xuân Phúc, kăn xiâm hnê ngăn tơnêi têa hiăng pơtroh kơthô rơkâu troh khu tơrŭm Đô̆i, mâu vâi muăn phô̆m vâ xông kân, vâi hdrêng, mâu vâi pú kăn ƀô̆ pơkuâ mâu phô̆m vâ xông kân,vâi hdrêng mâu tơdroăng ki pâ mơnê ƀă rơkong mâu tơdroăng ki tơniăn lĕm má môi.

Tung kơthô, kăn xiâm hnê ngăn tơnêi têa tối nhên: Pơtó ƀă mơdêk khôi hmâ khên tơnôu, hâi kố mâu rơxông phô̆m vâ xông kân, mâu vâi hdrêng, tiô rơkong Pôa hnê, đi đo pâ nhuô̆m, tơrŭm, hâk vâ ƀă tơdroăng cheăng, rơhêng vâ hriâm ƀối, hơnăm iâ pêi cheăng hiâ la ai hên tơdroăng tơmiât ki kân, rơhêng vâ tơdroăng cheăng tung la ngiâ Tơnêi têa.

Teăng mâ kăn pơkuâ Đảng, Tơnêi têa, kăn xiâm hnê ngăn tơnêi têa khĕn kơdeăn mâu tơdroăng pêi pro kơhnâ rơkê dêi mâu vâi muăn phô̆m vâ xông kân, vâi hdrêng, mâu vâi pú pơkuâ tơdroăng cheăng Đô̆i; tơdrêng amê hnối pơkâ thế Đoân Droh rơtăm Kŏng san Hồ Chí Minh pơtối hơ’lêh nếo tơdroăng, túa pơkâ pêi cheăng, mơjiâng khu tơrŭm Đô̆i krá rơdêi, pêi tro hnoăng cheăng rak vế, rak ngăn, hnê hriâm vâi hdrêng; rêm râ Đảng, khu kăn pơkuâ, mâu khu râ, kơvâ cheăng tơmâng ngăn pêi pro tro hnoăng cheăng dêi vâi hdrêng, kum mâu vâi muăn mơnhông tung tâi tâng kơvâ cheăng, rêh ối.

Katarina Nga tơplôu ƀă tơbleăng