VOV4.Sêdang - Kơxê hâi lơ 3/6/2021, a tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa hiăng tơdah pôa Yamada Takio, Kăn teăng mâ kong têa Nhuk a Việt Nam koh trâm mâ tơpui tơno ‘na tơrŭm cheăng trâu hơngế pơla Việt Nam – Nhuk. Pôa Nguyễn Xuân Phúc, Kăn xiâm hnê ngăn tơnêi têa tối phiu ro tơrŭm cheăng ton xŏn pơla Việt Nam – Nhuk tung pơla kố nah pơtối mơnhông lĕm tung mâu kơvâ cheăng; pơkâ thế kăn teăng mâ kong têa Nhuk pơtối thăm trâm mâ tơpui tơno khu râ kăn xiâm ƀă mâu khu râ pơla 2 tơnêi; tơrŭm, tŏng kum dêi pó tung hbrâ mơdât COVID-19; thăm tơrŭm cheăng kâ, mơhnhôk, thăm thế khu tê mơdró Nhuk po rơdâ mơ’no liăn cheăng, tê mơdró a Việt Nam.

Mơnê pôa Nguyễn Xuân Phúc hiăng mơdoh chô tơdah, kăn teăng mâ Nhuk tối pói vâ Kăn xiâm hnê ngăn tơnêi têa lăm pôu râ tơnêi têa troh a kong têa Nhuk tung hneăng pêi cheăng a Việt Nam. Kăn teăng mâ kong têa Nhuk mơnhên troăng hơlâ môi tuăn troh tá tui lui dêi Chin phuh Nhuk nhuô̆m tơrŭm cheăng ƀă Việt Nam; pơtối tŏng kum Việt Nam tung hbrâ mơdât COVID 19; thăm tơrŭm cheăng mơdêk hngêi trăng troăng klông, pơ’lêh pêi cheăng xúa kơmăi kơmok, tíu pêi cheăng; thăm mơhnhôk khu tê mơdró Nhuk mơ’no liăn cheăng a Việt Nam ƀă hía hé.

A Sa Ly tơplôu ƀă tơbleăng