VOV4.Sêdang - Kơxo lơ 12/5, pôa Nguyễn Xuân Phúc, Kăn xiâm hnê ngăn tơnêi têa tơdah Khu kăn kuăn ngo kong pơlê Bắc Giang  drêng rôh Khu kăn lăm pôu pơlê xiâm Hà Nội, troh lăm pôu Tíu pêi cheăng dêi kăn xiâm hnê ngăn tơnêi têa.

Tối tung mâu hơnăm hdrối, Bắc Giang hiăng tơkŭm pêi pro kơtăng, tơ-ƀrê tơdroăng cheăng xăm kơtiê, ôh tá xê to mơnhông pêi cheăng ƀă kơmăi kơmok, tê mơdró mê ối tơmâng khât troh mơnhông cheăng kâ rêh ối a kơpong hdroâng kuăn ngo, tơmiât ‘na tơdroăng xăm kơklêa kơdroh kơtiê a kơpong hngế hngo. 

Kăn xiâm hnê ngăn tơnêi têa tơdah mâu kăn hdroâng kuăn ngo kong pơlê Bắc Giang

Kăn xiâm hnê ngăn tơnêi têa tối nhên, Đảng, Tơnêi têa đi đo tơmâng khât troh kuăn pơlê mâu hdroâng kuăn ngo kơpong hngế hngo, kơpong kơtiê xơpá. Tung pơla dé ai khu ‘mêi đi đo hriăn vâ xo tơdroăng ‘na kuăn ngo, ‘na loi tĭng tiô khôp vâ pro tơklâ ki tơrŭm, vâ ‘nhiê troăng hơlâ dêi Đảng, Tơnêi têa, Kăn xiâm hnê ngăn tơnêi têa tối tơdroăng rak tơniăn, pơtối rak vế ki tơrŭm môi tuăn dêi hdroâng kuăn ngo ai pơxúa kal khât tung mơjiâng ƀă mơnhông tơnêi têa.

Gương tơplôu ƀă tơbleăng