VOV4.Sedang - Pêi tơdroăng cheăng a Pơlê kong kân Hồ Chí Minh, kơxê lơ 21/5, pôa Nguyễn Xuân Phúc, Kăn xiâm hnê ngăn tơnêi têa hiăng séa ngăn tơdroăng hbrâ mơdât pơreăng, rak tơniăn ăm kuăn pơlê khăm pơlât a Hngêi pơkeăng tơring Củ Chi. Drêng ai pơreăng kân COVID 19, Kăn xiâm hnê ngăn tơnêi têa tối nhên, ing pơkuâ dêi Đảng, tá khu cheăng kal kí hiăng veăng, tung mê, mâu ƀok thái pơkeăng hiăng plâ hâi plâ măng pêi cheăng piu dêi châ tơná, lo pêi cheăng hbrâ mơdât pơreăng tŭm túa, ing khăm ngăn, mơdât ôh tá ăm mot a kơpong ai pơreăng, klâ kơtăn, mơdât pơreăng, rak tơniăn ivá ƀă châ chăn dêi kuăn pơlê.

Kăn xiâm hnê ngăn tơnêi têa kheăn kơdeăn khu kăn ƀô̆, mơngế ƀok thái khăm pơlât Pơlê kong kân Hồ Chí Minh ƀă Hngêi pơkeăng Củ Chi hiăng ai hên troăng pêi kơtăng, châ tơƀrê hbrâ mơdât pơreăng ƀă tối nhên pêi tiô troăng pơkâ ôh tá ăm mâu hngêi pơkeăng tung lâp tơnêi têa tro tơdjâk xua ai mâu ngế tro tâ COVID 19.

Rơtế ƀă tơdroăng pơkuâ, hnê mơhno dêi Đảng, Tơnêi têa, Kăn xiâm hnê ngăn tơnêi têa pơkâ mâu khu râ kăn pơkuâ mơdât châ tơƀrê tung lâp tơnêi têa, ki má lối cho mâu pơlê kong kơdrâm, mâu kơpong hngêi kơmăi kơmok, kơpong ôm hyô, mâu hngêi pơkeăng, ôh tá ăm ai tơdroăng ki tơngôu kơdrâ.

A Sa Ly tơplôu ƀă tơbleăng