VOV4.Sedang - Tiô rơkong krếo dêi pôa Joe Biden, Kăn xiâm pơkuâ kong têa Mih, kơmăng lơ 22/4, pôa Nguyễn Xuân Phúc, Kăn xiâm hnê ngăn tơnêi têa hiăng veăng Roh pơxiâm po kân krip Hneăng hôp khu râ kăn xiâm ‘na hyôh kong prâi. Hneăng hôp châ tơkŭm po tiô troăng mơ’no tung um tơvi tung 2 hâi lơ 22 ƀă lơ 23/4/2021, ƀă pơkâ xiâm cho thăm mơhnhôk mâu kong têa lâp plâi tơnêi mâu tơkêa lâp plâi tơnêi ó rơdêi ‘na hbrâ ví kong prâi hơ’leh vâ châ mâu pơkâ rak hyôh tô plâi tơnêi ôh tá tâk hluâ 1,5 đô̆ C tâng pơchông hdrối rơxông kơmăi kơmok, tơtro ƀă tơdroăng môi tuăn Paris ‘na kong prâi hơ’leh.

Pôa Nguyễn Xuân Phúc, Kăn xiâm hnê ngăn tơnêi têa veăng hneăng hôp khu râ kăn xiâm

Tung tơkŭm po Hneăng hôp, pôa Nguyễn Xuân Phúc kô rơtế ƀă pôa Joe Biden ƀă Kăn xiâm pơkuâ mâu kong têa Tây Ban Nha, Nigeria ƀă Ba Lan veăng ƀă xông tơpui a roh hôp ki kal ‘na tơdroăng pơxá “Mâu  tơdroăng ki pơxúa cheăng kâ dêi mâu tơdroăng pêi pro ‘na kong prâi’’ tơkŭm po a kơmăng lơ 23/4.

A Sa Ly tơplôu ƀă tơbleăng