VOV4.Sedang - Kơxê lơ 6/5, pôa Đỗ Văn Chiến, Kăn xiâm pơkuâ hnê ngăn cheăng Đảng, Kăn xiâm hnê ngăn Vi ƀan Măt trâ̆n tơnêi têa Việt Nam, Kăn xiâm phŏ hnê ngăn Hô̆i đong tâ phĭu Tơnêi têa hiăng pêi cheăng ƀă kong pơlê Bà Rịa - Vũng Taù ‘na tơdroăng hbrâ tâ phĭu kăn teăng mâ Kuô̆k hô̆i hneăng XV ƀă kăn teăng mâ Hô̆i đong kuăn pơlê mâu râ hneăng hơnăm 2021 – 2026.

Lâp kong pơlê Bà Rịa - Vũng Tàu hiăng mơjiâng 814 tôh tâ phĭu a 814 kơpong tâ phĭu. Klêi kơ’nâi hneăng hôp tơpui tơno roh má pái, inâi mâu ngế tơbriât to pro kăn teăng mâ Kuô̆k hô̆i hneăng má XV cho 10 ngế; 85 ngế tơbriât to pro kăn teăng mâ Hô̆i đong kong pơlê; 430 ngế tơbriât to pro kăn teăng mâ Hô̆i đong kuăn pơlê râ tơring; 3.468 ngế tơbriât to pro kăn teăng mâ Hô̆i đong kuăn pơlê râ cheăm.

Pôa Đỗ Văn Chiến kheăn kơdeăn tơdroăng hbrâ tâ phĭu dêi kong pơlê Bà Rịa - Vũng Tàu; tơdrêng amê, pơchân tối kong pơlê thế tơtrŏng tơdroăng tơniăn tung kring vế, gak ngăn, ôh tá ai tơdroăng ki kơdrâ hdrối, tung ƀă kơ’nâi klêi kơ’nâi tâ phĭu.

A Sa Ly tơplôu ƀă tơbleăng