VOV4.Sêdang - Kơxo lơ 30/3, a Tíu pêi cheăng Kăn xiâm hnê ngăn tơnêi têa, pôa Nguyễn Phú Trọng, teăng mâ kăn xiâm pơkuâ ngăn Đảng, kăn xiâm hnê ngăn Tơnêi têa; jâ Đặng Thị Ngọc Thịnh, kăn xiâm phŏ hnê ngăn tơnêi têa hiăng diâp hlá mơ-éa Pơkâ dêi kăn xiâm hnê ngăn tơnêi têa pôk pôa Lê Khánh Hải, Ngế cheăng tung khu pơkuâ ngăn Tíu xiâm Đảng, kăn xiâm phŏ pơkuâ Ƀơrô cheăng kăn xiâm hnê ngăn tơnêi têa pro kăn pơkuâ Ƀơrô cheăng kăn xiâm hnê ngăn tơnêi têa.

Teăng mâ kăn pơkuâ Đảng, Tơnêi têa diâp hlá mơ-éa Pơkâ ăm pôa Lê Khánh Hải, jâ Đặng Thị Ngọc Thịnh tối, cho kăn ƀô̆ ki ai ivá cheăng pơkuâ, rak ngăn; châ xoăng pêi hên tơdroăng ki kal dêi Khu xiâm ngăn mơhno túa lĕm tro, tơ’noăng ƀă ôm hyô. Tơpui a rôh xo hnoăng cheăng, pôa Lê Khánh Hải tối hiâm mơno pôu râng dêi hnoăng cheăng, pơtối mơ-eăm pêi klêi mâu tơdroăng ki pơkâ thế, hnoăng cheăng ki châ pơcháu.

Katarina Nga tơplôu ƀă tơbleăng