VOV4.Sêdang - Jâ Võ Thị Ánh Xuân, kăn xiâm phŏ hnê ngăn tơnêi têa rơtế ƀă khu kăn ki pêi dêi hnoăng cheăng nếo troh pôu, hbru tơmeăm a tíu gak hbrâ mơdât pơreăng Covid-19 a kĭng têa kơxĭ ƀă tíu gâk hbrâ mơdât pơreăng a troăng tơkăng kong ki tơdjêp ƀă tơnêi ối tung Đông mố đô̆i gâk tơkăng kong bo cheăng kong têa ê Hà Tiên ƀă pêi cheăng ƀă kăn pơkuâ kong pơlê Kiên Giang ‘na hnoăng cheăng hbrâ mơdât pơreăng Covid-19.

Kăn xiâm phŏ hnê ngăn tơnêi têa pêi cheăng a Kiên Giang ‘na hnoăng cheăng hbrâ mơdât pơreăng Covid-19

A tíu troh pôu, jâ Võ Thị Ánh Xuân pôu kơ-êng ivá, tơdroăng cheăng kâ ƀă pêi pro hnoăng cheăng dêi mâu kăn ƀô̆, lêng veăng gak a mâu tíu hbrâ mơdât pơreăng a troăng tơkăng kong. Kăn xiâm phŏ hnê ngăn tơnêi têa khĕn kơdeăn ƀă mơnhên tối khât ivá mơ-eăm ‘mâi mơnhông mâu tơdroăng ki xơpá dêi khu ki hbrâ mơdât pơreăng Covid-19 a Hà Tiên; rơhêng vâ mâu khu ki mê pơtối tơkâ luâ mâu tơdroăng xơpá, mơ-eăm pêi klêi hnoăng cheăng.

Kăn xiâm phŏ hnê ngăn tơnêi têa pơchân Kiên Giang kal hbrâ rơnáu tâ nếo tung tơdroăng ki xing xoăng rơxế, tơdroăng ki tơ’lêi hlâu ƀă khu lêng gak vâ pêi pro hnoăng cheăng hbrâ mơdât pơreăng tung tơdroăng nếo.

Katarina Nga tơplôu ƀă tơbleăng