VOV4.Sêdang - Jâ Võ Thị Ánh Xuân, Kăn xiâm phŏ hnê ngăn tơnêi têa ƀă mâu ngế tơbriât to pro kăn teăng mâ Kuô̆k hô̆i hneăng má XV ƀă kăn teăng mâ Hô̆i đong kong pơlê An Giang hneăng má X, hneăng hơnăm 2021 – 2026, ối tung Tíu tâ phĭu kơxô̆ 1 hiăng ai mâu roh trâm mâ, tơpui tơno ƀă kuăn pơlê, mơhnhôk tâ phĭu tiô luât pơkâ a mâu bêng Mỹ Bình, Mỹ Long, Mỹ Phước, Mỹ Qúy, Mỹ Thới, Mỹ Thạnh, cheăm Mỹ Hòa Hưng, pơlê kong kơdrâm Long Xuyen, pơlê kân Óc Eo, cheăm Vọng Đông ƀă cheăm Vọng Thê, tơring Thoại Sơn, kong pơlê An Giang.

Xông tơpui ‘na tơdroăng pêi cheăng dêi tơná, jâ Võ Thị Ánh Xuân tối, tâng châ mâu kuăn pơlê loi tơngah rah xo tung kăn teăng mâ Kuô̆k hô̆i hneăng má XV, jâ kô pơtối pêi pro mâu tơdroăng ki tá hâi châ tơƀrê môi tiah pói vâ ƀă tơdrêng amê kô pêi hnoăng cheăng kăn teăng mâ Kuô̆k hô̆i nôkố cho Kăn xiâm phŏ hnê ngăn tơnêi têa vâ pêi pro tơtro tâ tơdroăng kal vâ, pói vâ dêi kuăn pơlê.

A Sa Ly tơplôu ƀă tơbleăng