VOV4.Sedang - Kơxo lơ 16/5, khu lêng kuăn pơlê ôí tung tơring rơlố Trường Sa, kong pơlê Khánh Hòa hiăng rơtế lăm tâ phĭu rah xo kăn teăng mâ Kuô̆k hô̆i hneăng má XV ƀă Hô̆i đong kuăn pơlê mâu râ, hneăng hơnăm 2021 – 2026. Kuăn pơlê a 2 cheăm rơlố Sinh Tồn, Song Tử Tây ƀă pơlê kân Trường Sa rĕng tâ phĭu hdrối. Krê kơpong tâ phĭu pơlê kân Trường Sa (rơlố Trường Sa Lớn) ƀă 3 kơpong tâ phĭu ki ê nếo ối tung tơring Trường Sa xuân tơkŭm tâ phĭu tro tiô hâi khế pơkâ cho hâi lơ 23/5.

Nôkố, kơpong rơlố Trường Sa pơxiâm ai kong tô, hên rơlố, mâu tíu rơlố trâm pá tung tơdroăng rêh ối. Khu lêng ƀă kuăn pơlê tung mâu rơlố hiăng mơ-eăm tơkâ luâ mâu tơdroăng pá puât, hbrâ ăm tơtro tơdroăng tâ phĭu xua mê leh pơxiâm po ƀă tơdroăng tâ phĭu a mâu tíu tâ phĭu tơ’lêi hlâu, tro tiô pơkâ. Peăng kơxo, hên tíu tâ phĭu hiăng kêi đeăng tơdroăng tâ phĭu.

A Sa Ly tơplôu ƀă tơbleăng