VOV4.Sêdang - Tổng Liên đoân pêi cheăng Việt Nam xuân nếo tơkŭm po tơpui tơno mơ’no tơdrêng tung um tơvi pêi pro Khế Kŏng nhân hơnăm 2021 ƀă dó inâi “Rŭm môi tuăn, tơmiât pêi rơkê, tơkâ hluâ pá puât, mơnhông mơdêk”. Xua tơdjâk dêi pơreăng COVID 19 xua mê, hên khu tê mơdró, kơ koan, tíu cheăng ƀă đoân viên, mơngế pêi cheăng tro tơdjâk kân.

Thăm nếo, rơtuh ngế kŏng nhân pêi cheăng tung lâp tơnêi têa kal rŭm môi tuăn, tơmiât pêi rơkê vâ tơkâ hluâ mâu tơdroăng pá puât a ngiâ ƀă ai hiâm mơno mơ-eăm xông tơtêk, ai tơdroăng pói vâ mơnhông mơdêk xua hơniâp lĕm dêi châ tơná, rơpŏng hngêi, tơdroăng ki vêh tơniăn lĕm, mơnhông dêi khu tê mơdró ƀă tơdroăng mơnhông mơdêk tŭm túa dêi tơnêi têa.

Tơpui tơno mơ’no tơdrêng tung um tơvi Khế Kŏng nhân hơnăm 2021

Xua mê, Khế Kŏng nhân hơnăm kố ai tơdroăng pơxá: “Rŭm môi tuăn, Tơmiât pêi rơkê, Tơkâ hluâ pá puât, Mơnhông mơdêk”. Môi tung mâu  tơdroăng xiâm dêi khế kŏng nhân hơnăm kố cho Tơdroăng “75 rơpâu troăng tơmiât pêi rơkê, tơkâ hluâ pá puât, mơnhông mơdêk”. Kơxô̆ 75 rơpâu troăng tơmiât pêi rơkê ƀă pói vâ kŏng nhân Việt Nam pâ vế, nhuô̆m, pro trâu hơngế tâ tơdroăng Hâi lâp plâi tơnêi pơtê cheăng a Việt Nam kơtăn kố 75 hơnăm châ tơkŭm po mit ting kân krip a pơlê kong xiâm Hà Nội. Tơdrêng amê koh phiu ro 75 hơnăm Hâi tâ phĭu rah xo apoăng, rah xo Kuô̆k hô̆i tơnêi têa Kŏng hoa xah hô̆i chuh ngiah Việt Nam.

A Sa Ly tơplôu ƀă tơbleăng