VOV4.Sêdang - Kơxê lơ 29/8, khu ƀok thái pơkeăng dêi kong pơlê Gia Lai hiăng lo lăm veăng hbrâ mơdât pơreăng COVID-19 a Pơlê kong kân Hồ Chí Minh. Khu râ kăn pêi cheăng ai 4 ngế ƀok thái pơkeăng ƀă 17 ngế điêu yưỡng dêi kong pơlê Gia Lai ối tung mâu hngêi pơkeăng: Hngêi pơkeăng kân kong pơlê; Hngêi pơkeăng pơlât vâi hdrêng; Hngêi pơkeăng Y dươ̆c pơlât ƀă pơkeăng rêi nhâ hlá loăng ƀă Tíu xiâm khăm pơlât mâu tơring, pơlê krâm, pơlê kong kơdrâm. Khu ƀok thái pơkeăng kô troh Hngêi pơkeăng pơtân pơlât COVID-19 pơlê kân Tân Phú, Pơlê kong kân Hồ Chí Minh pêi pro hnoăng cheăng pơlât ăm mâu ngế tro tâ pơreăng COVID-19 tung pơlê kân.

Khu ƀok thái pơkeăng kong pơlê Gia Lai lo lăm tŏng kum Pơlê kong kân Hồ Chí Minh hbrâ mơdât pơreăng

Rêm ngế ƀok thái pơkeăng tung khu pêi cheăng châ kong pơlê tŏng kum kơxuô tơmeăm 10 rơtuh liăn ƀă hbrâ tŭm mâu tơmeăm khoăng, tơmeăm hbrâ mơdât pơreăng. Ahdrối vâ lo lăm pêi hnoăng cheăng, khu ƀok thái pơkeăng dêi kong pơlê Gia Lai châ hnê mơhno ‘na pêi cheăng tung mơnhên tối tơdroăng châi ƀă troăng pơlât, rak ngăn mâu ngế tro COVID-19, Tơdroăng hbrâ mơdât pơreăng COVID-19 tâ tú. Tơdroăng xo têa môh, têa hế mâu ngế pơreăng vâ khăm ngăn, pơkuâ, pơto pơreăng SARS-CoV-2 vâ pơtroh séa ngăn.

A Sa Ly tơplôu ƀă tơbleăng