VOV4.Sedang - Kơxê lơ 28/5, pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ hnê mơhno tơnêi têa hbrâ mơdât Covid 19 hiăng hôp mơ’no tơdrêng tung um tơvi, tơmâng tơbleăng ‘na tơdroăng hbrâ mơdât pơreăng dêi péa kong pơlê Bắc Ninh, Bắc Giang. Tiô tơbleăng, kong pơlê Bắc Giang hiăng tơkŭm rah khăm ngăn rơdâ ƀă mâu kơpong tá hâi ai pơreăng, mâu tơring tá hâi klâ kơtăn pơlê pơla; thăm seá ngăn mâu ngế ki kơ-o, tơngê. A Bắc Giang, klêi kơ’nâi châ hlo mâu ngế dương tĭnh a kơpong hngêi kơmăi kơmok Khắc Niệm, kong pơlê Bắc Ninh dế pêi pro kơtăng mâu troăng hbrâ mơdât pơreăng, tung mê thăm rĕng rah xo khăm ngăn mâu kơpong, ƀă lối 30 rơpâu mơheăm châ xo vâ khăm ngăn. A roh hôp, pôa Vũ Đức Đam pơkâ thế, kong pơlê Bắc Ninh ƀă Bắc Giang pơtối tơkŭm khăm ngăn, rah xo rơdâ vâ mơdât pơreăng, rak tơniăn ăm mâu kơpong hngêi kơmăi kơmok.

A Sa Ly tơplôu ƀă tơbleăng