VOV4.Sêdang - Kơxo lơ 19/5, drêng troh leh tơbâ 131 hơnăm hâi kot mâ Pôa Hồ Chí Minh, Kăn xiâm hnê ngăn tơnêi têa ki apoăng, khu kăn dêi Tíu xiâm Đoân droh rơtăm tơrŭm ƀă Khu pơkuâ ngăn Đoân kong pơlê Trà Vinh tơkŭm po leh lăm pôu ngăn ƀă chôu nhang a Tíu tơbâ Pôa Hồ  cho a cheăm Long Đức, pơlê kong kơdrâm Trà Vinh. Kong pơlê Trà Vinh ai lối 47 rơpâu ngế đoân viên, droh rơtăm, luâ 5 hơnăm tơku\m tơbleăng hriâm tiô hnê mơhno kơxô̆ 05 dêi khu xiâm kal kí ‘na ‘’Mơdêk hriâm ƀă pêi pro tiô troăng tơdjâ hiâm mơno Hồ Chí Minh’’ hiăng pro pơ’lêh rơdêi trâu rơdâ ‘na tơdroăng hriâm, mơjiâng khu kăn ƀô̆, đoân viên.

Pakĭng mê Đoân rêm râ tung kong pơlê xông pêi pro túa hriâm tâp ƀă pêi pro tiô tuăn mơno, hnê mơhno túa pêi cheăng Hồ Chí Minh rơtế ƀă tơdroăng tơleăng mơnhên mâu tơdroăng ki tô tuăn dêi kong pơlê, tíu pêi cheăng, veăng pêi ki tơ-ƀrê tơdroăng mơnhông cheăng kâ-rêh ối, mơjiâng Đảng, khu cheăng kal kí rế ton rế lê̆m tro, krá rơdêi. Rôh kố Khu pơkuâ ngăn Đoân dêi Tíu xiâm ƀă khu pơkuâ ngăn Đoân kong pơlê Trà Vinh tơkŭm pêt 20 xiâm loăng ngiât tung kơdrum tíu tơbâ Pôa Hồ.

Katarina Nga tơplôu ƀă tơbleăng