VOV4.Sêdang - Kơxê lơ 15/3, a pơlê kân Lộc Thắng, tơring Bảo Lâm, kong pơlê Lâm Đồng, Vi ƀan Khoa hok, Kong ngê̆ ƀă Môi trường dêi Kuô̆k hô̆i hiăng ai rôh pêi cheăng ƀă tôh Bauxite – nhôm Tân Rai Lâm Đồng ƀă Nhân Cơ, kong pơlê Dak Nông ‘na tơdroăng ki pêi pro mâu tơdroăng pâ thế dêi khu kăn séa ngăn dêi grup pơkuâ Kơmăi kơmok Kơchâ – Kế tơmeăm khoăng tung kơdâm tơnêi Việt Nam, a hơnăm 2020.

Tâ tá rôh pêi cheăng

Maluâ trâm hên xơpá xua tơdjâk dêi pơreăng Covid-19 la tá peá to hngêi kơmăi Bauxite Tân Rai ƀă Nhân Cơ pơrá rak tơniăn mơjiâng pro lối 707 rơpâu tâ̆n alumin, kơxô̆ liăn châ xo 2.700 rơtal liăn, châ tâi tâng ki tơkâ sap ing mâu tơdroăng cheăng mơjiâng pro tê mơdró châ 62 rơtal 200 rơtuh liăn; hngêi kơmăi Nhân Cơ mơjiang pro châ lối 715 rơpâu tâ̆n, kơxô̆ liăn châ xo 2.900 rơtal liăn ƀă ki tơkâ vâ chê 29 rơtal liăn.

Khu kăn pêi dêi hnoăng cheăng séa ngăn khât a tíu ki mơ’no ngôi kơtâk, hyôh a Hngêi kơmăi Alumin Tân Rai

‘Na hnoăng cheăng rak vế kong prâi tơnêi tíu, mâu hngêi kơmăi pơrá ai tơdroăng ki ivá mơ-eăm tung tơbleăng pêi pro tơdâng tơ'mô mâu troăng hơlâ hbrâ mơdât ki ‘mêi sap ing rôh mơjiâng pro; ki dâi lĕm dêi kong prâi tơnêi tíu mâu kơpong pêi cheăng hlo hơ'leh hên. Tơpui mơgêi a rôh pêi cheăng, khu kăn pơkâ thế kal pơtối pêi pro mâu tơdroăng ki pâ thế dêi khu ki séa ngăn ‘na hnoăng cheăng rak vế kong prâi, malối cho 3 tơdroăng cho long ki ‘măn trâp khêi, tíu ki ‘no ngôi kơtâk kơchâ ƀă pêt loăng ngiât ‘mâi mơnhông kong prâi tung kơpong ki chiâ xo a Hngêi kơmăi Alumin Nhân Cơ.

Katarina Nga tơplôu ƀă tơbleăng