VOV4.Sêdang - Măng tĭng hdrối, Hneăng hôp má péa, Kuô̆k hô̆i hneăng má 15 po tiô tơdroăng ki ‘no tơdrêng ing troăng hyôh internet ing tíu mơ’no sap ing Hngêi Kuô̆k hô̆i troh 62 Khu kăn Kuô̆k hô̆i mâu kong pơlê, pơlê kong kân ối tung Tơnêi têa. Rơtế ƀă hnoăng cheăng chêh pro luât, hneăng hôp kố, Kuô̆k hô̆i mơdoh chôu vâ séa ngăn mâu tơdroăng cheăng kâ rêh ối pơlê pơla, liăn ngân tơnêi têa, séa ngăn mâu tơdroăng kal ki ê. Măng tĭng hdrối, Khu kăn Kuô̆k hô̆i mâu kong pơlê a kơpong Tây Nguyên hiăng kơhnâ veăng tung mâu hneăng hôp; tung mê, ai hên rơkong tơpui tối ki ai tơdjâk troh tơdroăng ki ai khât tung kơpong.

Klêi tâng tối tơbleăng ‘na hlá mơ-eá chêh Pơkâ ‘na mâu luât pơkâ, luât tŏng kum mơnhông mơdêk mâu kong pơlê, pơlê kong kơdrâm, pơlê kong kân: Hải Phòng, Nghệ An, Thanh Hóa  ƀă Thừa Thiên Huế ƀă Hlá mơ-éa tơbleăng séa ngăn ‘na tơdroăng chêh tung hlá mơ-éa luât ‘na mâu luât pơkâ, luât tŏng kum mơnhông mơdêk mâu kong pơlê ki mê, Khu kăn Kuô̆k hô̆i kong pơlê Dak Lak hiăng tơpui tơno, vâ môi tuăn ƀă hiăng môi tuăn dêi rơpó mâu tơdroăng chêh pơtroh, tung hlá mơ-éa tối tơbleăng.

Pakĭng mê, ăm hnê tối ‘na tơdroăng mê. Khu kăn Kuô̆k hô̆i kong pơlê Dak Lak tối, tơdroăng ki kal chêh pơtroh ăm Chin phuh tơniăn chêh tơdroăng kal. Mâu hồ sơ chêh pơtroh hiăng nhên khât. Tâng Pơkâ mê châ tơbleăng kô pro tơ’lêi ăm mâu kong pơlê mơnhông mơdêk hbrâ ƀă potối rak vế tơmeăm khoăng ai hlâu dêi tơná. Laga, kal thế tơmâng troh ki xêt khât hlối pêi pro. Pôa Y Vinh Tơr, Ngế pơkuâ Khu  kăn Kuô̆k hô̆i  kong pơlê Dak Lak pâ thế:

“Ki xêt pêi pro xuân môi tuăn a rôh ing apoăng hơnăm 2022 vâ pro tơ’lêi hlâu ăm mâu kong pơlê ki ai pơla mâu rôh mơnhông mơdêk. Xua mê kố cho mâu luât pơkâ ki mơnúa, mâu luât pơkâ ki kal xuân ai rôh ki nhên. Tung tối tơbleăng séa ngăn xuân ai tối tâi hơnăm 2025 cho tơ-tro vâ drêng pơkâ mâu luât tŏng kum tung tơrêm rôh ăm i nhên. Tiah mê, troh a rôh ki mê pin tối nếo tâng luât pơkâ ki mê tơ-ƀrê, tơ-tro mê pin kô pơtối po rơdâ xúa a luât pơkâ chiâng luât pơkâ tơchoâm ăm mâu kong pơlê vâ pro tơ’lêi hlâu mơnhông mơdêk nếo tung pơla mâu khế pêi pro nếo”.

Khu kăn Kuô̆k hô̆i kong pơlê Kon Tum veăng a rôh hôp

Veăng hnê tối tơpui tối ‘na tơdroăng pêi pro tiô luât pơkâ tŏng kum, tơdroăng tŏng kum ƀaoh hiêm pơlê pơla, Khu kăn Kuô̆k hô̆i kong pơlê Kon Tum pâ thế kal pơtối tŏng kum ‘na ƀaoh hiêm khăm pơlât ăm mâu ngế ki oh tá ai liăn rôe. Kố cho tơdroăng ki kal kum kuăn pơlê, malối mâu hdroâng kuăn ngo ki ai ivá, ai liăn ngân châ khăm pơlât, vâ kơdroh ki hngăm hngo ‘na liăn ngân.

Pôa Phạm Đình Thanh, Ngế xiâm phŏ pơkuâ Khu kăn Kuô̆k hô̆i kong pơlê Kon Tum tơbleăng tơdroăng, mê cho klêi kơ’nâi Ngế pro xiâm hnê ngăn Chin phuh pơkâ tơdroăng Pơkâ kơxô̆ 861 ‘na kĭ inâi mâu cheăm kơpong III, kơpong II, kơpong I dêi kơpong hdroâng kuăn ngo ƀă kong ngo pơla hơnăm 2021-2025, kơxô̆ mơngế châ hngêi rak liăn ngân Tơnêi têa kum kơxô̆ liăn nâp rôe baoh hiêm khăm pơlât dêi kong pơlê hiăng kơdroh hên.

Tí tăng ki ai khât dêi Khu kăn Kuô̆k hô̆i kong pơlê Kon Tum ăm hlo, tung kơxô̆ mâu ngế ôh tá ối châ Tơnêi têa tŏng kum ‘na ƀaoh hiêm khăm pơlât, ai hên ngế pá puât khât ‘nâng, ôh tá ai liăn vâ rôe ƀaoh hiêm khăm pơlât ăm tơná ƀă ăm rơpŏng hngêi. Malối, mâu ngế ki mê ki hên to mâu hdroâng kuăn ngo. Tung kơxô̆ lối 51 rơpâu ngế kuăn pơlê dêi kong pơlê Kon Tum ôh tá ối châ tơnêi têa tŏng kum ‘na ƀaoh hiêm khăm pơlât vâ tối ai lối 49 rơpâu 300 ngế hdroâng kuăn ngo, hên lối 95%. Ki khât gá ăm hlo tơdroăng nếo tối mê âi, pôa Phạm Đình Thanh pâ thế:

“Chin phuh, Ngế pro xiâm hnê ngăn Chin phuh kal hnê mơhno ăm mâu Khu xiâm Kơvâ cheăng ki tơdjâk troh rĕng séa ngăn tối tro mâu tơdroăng vâ teăm pơkâ mâu luât ki tơtro vâ pơtối tŏng kum ‘na ƀaoh hiêm khăm pơlât ăm mâu kuăn pơlê ki trâm pá tung rêh ối ôh tá ai liăn kâi châ rôe ƀaoh hiêm khăm pơlât vâ kum ăm kuăn pơlê, malối mâu hdroâng kuăn ngo ai tơdroăng rêh ối chía chiá ai liăn khăm pơlât ivá, kơdroh iâ ki hngăm hngo, pá puât tô tuăn ‘na liăn ngân ƀă xuân veăng kum tâk rế hên kơxô̆ mơngế kuăn ngo châ veăng rôe ƀaoh hiêm khăm pơlât, vâ troh hơnăm 2025 ai 98% ngế hdroâng kuăn ngo veăng rôe ƀaoh hiêm khăm pơlât tiô pơkâ ki Pơkâ kơxô̆ 88, Kuô̆k hô̆i hneăng 14 hiăng pơkâ”.

Khu kăn Kuô̆k hô̆i kong pơlê Dak Lak hôp tơpui tơno mâu  tơdroăng ki kal a rôh hôp

Khu kăn Kuô̆k hô̆i kong pơlê Dak Lak tối tiah kố, tơdroăng ‘mâi hơ’lêh Luât mơdró ƀaoh hiêm cho kal ‘nâng vâ kring vế hnoăng rêh ối ƀă ki tro luât dêi mâu Khu tơrŭm, mâu ngế veăng rôe ƀaoh hiêm; mơdêk tơdroăng tê mơdró ƀaoh hiêm; veăng mơdêk pơtối rak vế mơnhông mơdêk krá tơniăn ‘na cheăng kâ-rêh ối, tơniăn tơdroăng rêh ối kuăn pơlê, mơdêk rak ngăn tơnêi têa ƀă tơdroăng tê mơdró ƀaoh hiêm. Laga, hên troăng hơlâ tê mơdró ƀaoh hiêm kal ai pơkâ nhên, tơdah tâ.

Ki vâ tối, ‘na kĭ tơkêa ƀaoh hiêm: Mâu pơkâ dêi luât môi tiah vâ tơpui hên ‘na hnoăng kring vế dêi mâu kơ koan khu mơdró ƀaoh hiêm mê ki hên tâ, môi tiah a tài khoản 1, troăng 14 ai chêh tối rêm pâ ai hnoăng chiâng tơhrâ ‘na tơdroăng ki kal dêi kĭ tơkêa, ki khât gá tơdroăng mê ối tơvâ tơvân. Jâ Lê Thị Thanh Xuân, kăn phŏ pơkuâ Khu kăn Kuô̆k hô̆i kong pơlê Dak Lak pâ thế:

“Ki hên mâu kĭ tơkêa châ kơ koan ƀaoh hiêm rah chêh. Ƀă mâu ngế ki hriâm lâm kân ki chiâng pơchuât ngăn ƀă ‘nâi mâu troăng chêh tung luât ki mê ai pơxúa há lơ ôh ăm tơná. La ƀă mâu ngế ki môi tiah mê cho hdroâng kuăn ngo, mâu ki oh tá ai liăn kâi châ rôe, tơdroăng pơchuât tŭm ƀă hlê tâi tâng mâu troăng chêh tung hlá mơ-éa kĭ tơkêa mê cho tơdroăng ki pá. Xua mê kal thế pro tơniăn pơla rêm pâ ki rôe ƀă rêm pâ ki chêh ăm. Ngin pâ thế pơchuât ngăn nhên tơtro troh tơdroăng chêh tung hlá mơ-éa kĭ tơkêa baoh hiêm vâ pro ti lâi ‘na tơdroăng chêh, chư chêh tung hlá mơ-éa kĭ tơkêa thế chêh nhên hleăng amê, chêh tơ’lêi hlê há. Vâ mâu ngế ki ôh tá ‘nâi hlê xêh drêng pơchuât  ngăn kô hlê hlối. Malối ‘na tơdroăng chêh kring vế  kuăn mơngế”.

Xuân a hneăng hôp tơpui tơno, Khu kăn Kuô̆k hô̆i kong pơlê Dak Lak hiăng veăng hnê tối mâu tơdroăng ki tơdjak troh: ăm liăn kĭ tơkêa ƀaoh hiêm, tơleăng mơnhên tơbriât ‘na ƀaoh hiêm, hnoăng rak ngăn tơnêi têa ƀă mâu tíu ki mơdró ƀaoh hiêm a kong pơlê, tơkŭm ăm hriâm tơ’nôm, hnê hriâm vâ mơdêk ki rơkê plĕng, mơnhên tơdroăng tê mơdró ƀaoh hiêm vâ séa ngăn mâu tơdroăng pêi pro ki kơdroh tí tăng pro nếo ai mâu tơdroăng ‘na săm phoăng, săm tơkêng ƀă hên ki ê.

VOV Tây Nguyên

Gương tơplôu ƀă tơbleăng