VOV4.Sêdang - Kơxê lơ 26/4, Khu kăn ki pêi hnoăng cheăng dêi Vi ƀan Tíu xiâm Măt trâ̆n Tơnêi têa Việt Nam xua jâ Trương Thị Ngọc Ánh, kăn xiâm phŏ hnê ngăn Vi ƀan Măt trâ̆n Tơnêi têa Việt Nam pro kăn pơkuâ khu kăn kố hiăng séa ngăn, hnoăng cheăng tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn rêm râ hơnăm 2021 – 2026 a kong pơlê Bạc Liêu. Riân troh nôkố, Vi ƀan tâ phĭu rêm râ tung kong pơlê hiăng pơkâ ƀă tơbleăng tíu tâ phĭu, inâi mâu tíu tâ phĭu, mâu kăn ki châ pôk a rêm tíu tâ phĭu. Troh nôkố, tâi tâng kuăn pơlê tung lâp kong pơlê hiăng châ pơkâ lối 611.700 ngế, tung tâi tâng kơpong tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn rêm râ hơnăm 2021 – 2026 ai 551 kơpong ƀă hía hé.

Tơpui a rôh pêi cheăng, jâ Trương Thị Ngọc Ánh pơkâ thế: Sap ing nôkố troh hâi tâ phĭu, Bạc Liêu pơtối mơdêk hnoăng cheăng tơbleăng vâ kuăn pơlê ‘nâi nhên, ‘nâi tŭm ‘na hnoăng cheăng, ƀă hnoăng cheăng pôu râng dêi kuăn pơlê, ki pơxúa ƀă ki kal dêi rôh tâ phĭu.

Katarina Nga tơplôu ƀă tơbleăng