VOV4.Sêdang - Hâi lơ 14/5, pôa Bùi Văn Cường, Kăn cheăng tung Tíu xiâm Đảng, Kăn pơkuâ Ƀơrô Kuô̆k hô̆i, Kăn chêh tôm xo rơkong Kuô̆k hô̆i ai roh pêi cheăng ƀă kong pơlê Gia Lai, Kon Tum ‘na tơdroăng pêi pro tơdroăng tâ phĭu rah xo kăn teăng mâ Kuô̆k hô̆i hneăng má XV ƀă kăn teăng mâ Hô̆i đong kuăn pơlê mâu râ hneăng hơnăm 2021 – 2026. A kong pơlê Gia Lai, troh nôkố, kong pơlê hiăng tơkŭm po 17 roh trâm mâ pơla kuăn pơlê ƀă ngế tơbriât to pro kăn teăng mâ Kuô̆k hô̆i hneăng má XV ƀă 155 tíu trâm mâ kuăn pơlê ƀă kăn teăng mâ Hô̆i đong kuăn pơlê kong pơlê hneăng hơnăm 2021 – 2026.

Pôa Bùi Văn Cường, Ngế cheăng tung tíu xiâm Đảng, Kăn hnê ngăn Ƀơrô Kuô̆k hô̆i, Kăn chêh tôm xo rơkong Kuô̆k hô̆i pêi cheăng a Tíu pơkuâ cheăng Đảng kong pơlê Gia Lai

Ƀă ki phá tơ-ê cho tíu ai kơdrâm vâi krâ hdroâng kuăn ngo, Vi ƀan tâ phĭu mâu râ dêi kong pơlê Gia Lai hiăng tơtrŏng tung tơdroăng pơtâng tối troh mâu râ kuăn pơlê; pêi pro kơtăng mâu pơkâ hbrâ mơdât pơreăng COVID 19, tơniăn ăm hneăng tâ phĭu.

Pôa Bùi Văn Cường, Ngế cheăng tung tíu xiâm Đảng, Kăn hnê ngăn Ƀơrô Kuô̆k hô̆i, Kăn chêh tôm xo rơkong Kuô̆k hô̆i pêi cheăng a Tíu pơkuâ cheăng Đảng kong pơlê Kon Tum

A kong pơlê Kon Tum, Vi ƀan tâ phĭu kong pơlê hiăng pêi pro tơtro, tro tiô pơkâ mâu tơdroăng xiâm tơdroăng tâ phĭu tiô troăng hnê mơhno dêi Tơnêi têa ƀă luât pơkâ. Pôa Bùi Văn Cường tối nhên, mâu kong pơlê peăng kơnhŏng Tây Nguyên kal tơkŭm hnê mơhno, xing xoăng hnoăng cheăng nhên ăm khu mơngế pêi tơdroăng tâ phĭu ƀă hbrâ hdrối, tơleăng mâu tơdroăng tơvâ tơvân nếo ai.

A Sa Ly tơplôu ƀă tơbleăng