VOV4.Sêdang - Khu kăn xiâm pơkuâ hnê ngăn Đảng tơbleăng kơthô thế pơtối mơdêk hnoăng cheăng hbrâ mơdât pơreăng COVID-19. Ing mê, Khu kăn xiâm pơkuâ hnê ngăn Đảng thế rêm râ cheăng Đảng, khu tơrŭm Đảng, mâu kăn Măt trâ̆n Tơnêi têa ƀă mâu khu grup rêm râ tơkŭm pơkuâ hnê ƀă tơkŭm pêi pro kơtăng 6 tơdroăng cheăng ki xiâm, tơbleăng pêi kơtăng tro mâu hlá mơ-eá hnê mơhno dêi Khu kăn Đảng, Ngế pro xiâm hnê ngăn Chin phuh, Khu hnê mơhno dêi tơnêi têa hbrâ mơdât pơreăng COVID-19 ƀă hnê mâu Khu xiâm ngăn pơkeăng pơlât; pôi tá tơngôu, thế đi đo hbrâ rơnáu tung tơdroăng mơdât pơreăng.

Malối tung mâu hâi pơtê leh lơ 30/4 ƀă lơ 1/5 xuân môi tiah hâi tâ phĭu rah xo kăn Kuô̆k hô̆i hneăng 15 ƀă Hô̆i đong hnê ngăn kuăn pơlê rêm râ hneăng hơnăm 2021-2026; mơdêk hnoăng cheăng séa ngăn lăm ngăn nhên a troăng tơkăng kong, bo cheăng tê mơdró tơkăng kong, a kơno têa kơxĭ; pêi pro tŭm mâu tơdroăng hbrâ mơdât pơreăng tiô hnê mơhno dêi Khu xiâm ngăn pơkeăng pơlât ƀă pơxâu phak mâu khu, mâu ngế ki lâi pro xôi tung tơdroăng hbrâ mơdât pơreăng; Hnê mơhno rĕng pêi tro mâu tơdroăng pơkâ pâk vaccine hbrâ mơdât COVID-19.Pakĭng mê, pơtối mơdêk hnê tối mơdêk hlê plĕng dêi kuăn pơlê tung tơdroăng hbrâ pêi mâu pơkâ, mơdât pơreăng COVID-19.

Gương tơplôu ƀă tơbleăng