VOV4.Sêdang - Hâi lơ 1/6, a Hà Nội, khu râ kăn pơkuâ Khu xiâm pơkuâ Kŏng an hiăng hôp mơ’no tơdrêng ƀă Kŏng an mâu kơ koan cheăng, kong pơlê vâ séa ngăn, môi tuăn mâu troăng hbrâ mơdât COVID 19 tung khu kŏng an kuăn pơlê. Drêng pơreăng COVID 19 xông tâ tú ó tung lâp tơnêi têa, Khu xiâm pơkuâ kŏng an pêi pro thâ mâu troăng hbrâ mơdât pơreăng; pêi pro tơbleăng tối ăm ƀok thái pơkeăng ƀă pêi pro kơtăng pơkâ klâ kơtăn tơkŭm, klâ kơtăn a hngêi hbrâ mơdât pơreăng; thăm hbrâ mơdât pơreăng tung mâu tíu khăm pơlât châi tamo Kŏng an kuăn pơlê; pêi pro pâk vaccine hbrâ mơdât COVID 19 tung khu Kŏng an kuăn pơlê.

Kŏng an mâu tíu cheăng, kong pơlê pơtối rĕng pêi pro ti tăng mâu ngế ki tơdjâk troh mâu ngế tro tâ pơreăng nếo tung pơlê pơla, tơniăn gak kring, tơniăn mâu tíu gak, tíu klâ kơtăn, tíu klâ kơtăn tơkŭm, Hngêi pơkeăng pơlât mâu ngế tro tâ pơreăng COVID 19 tung kong pơlê.

A Sa Ly tơplôu ƀă tơbleăng