VOV4.Sêdang - Khu pơkuâ ngăn lêng kong pơlê Lâm Đồng nếo kĭ tơkêa tơrŭm cheăng ƀă Khu pơkuâ tơdroăng khôp Phop Việt Nam a kong pơlê Lâm Đồng. Tơdroăng ki tơrŭm kô rak vế krá tơniăn tâ nếo tơrŭm cheăng pơla khu lêng ƀă kuăn pơlê, mơnhông hiâm mơno tơrŭm hdroâng kuăn ngo. Tơdrêng amê hnối cho tíu ki vâ pơtối pêi pro tro tơdroăng ki “Mơhnhôk rơkê’’ ƀă “Mơhnhôk tơ’ló tung mơjiâng thôn pơlê nếo’’.

Tung mâu hơnăm hdrối mê hía nah, kong pơlê Lâm Đồng đi đo tơmâng troh tơdroăng loi tĭng, tiô khôp. Ing mê, pro tơdroăng ki achê, hlê plĕng dêi pó pơla mâu khu pơkuâ tơdroăng khôp ƀă mâu kơ koan, khu cheăng, kơvâ cheăng ƀă khu râ kăn pơkuâ kong pơlê. Tơdroăng ai khât hiăng mơnhên troăng hơlâ loi tĭng tiô khôp tơtro dêi Đảng ƀă Tơnêi têa; kuăn khôp cho khu ki ôh tá chiâng klâ dêi Khu rŭm môi tuăn tâi tâng hdroâng mơngế.

Khôp Phop ƀă khu mô đô̆i sap ing hdrối nah troh nôkố đi đo rơtế dêi pó tung hên tơdroăng pêi cheăng. Tơdroăng rơtế mê hiăng kum rak krá tơniăn kal kí, tơniăn lâp pơlê pơla. Tơdrêng amê, kum mơdêk um méa Mô đô̆i Pôa Hồ tung hiâm mơno kuăn pơlê.

Khu xiâm pơkuâ lêng kong pơlê Lâm Đồng lăm pôu ƀă rơkâu Hngêi khôp xiâm Phop Linh Quang, pơlê kong kơdrâm Đà Lạt klăng roh tĭng kân Vu Lan

Pêi pro Pơkâ dêi Khu pơkuâ cheăng Đảng Tơnêi têa ƀă pơkâ dêi Đảng ủy Kuân khu 7 ‘na pơtối hơ’leh nếo ƀă thăm pơkuâ, hnê mơhno Khu lêng pêi pro tơdroăng loi tĭng tiô khôp tung rơxông nếo. Khu xiâm pơkuâ mô đô̆i kong pơlê Lâm Đồng hiăng kĭ tơkêa tơdroăng tơrŭm cheăng ƀă Khu pơkuâ khôp Phop Việt Nam kong pơlê a poăng khế 4 kố nah.

Đăi tă Trần Văn Khương – Chính uỷ Khu xiâm pơkuâ mô đô̆i kong pơlê Lâm Đồng mơnhên: “Tơdroăng kĭ tơkêa tơdroăng tơrŭm kố vâ pơtối thăm rŭm môi tuăn tâi tâng hdroâng mơngế, mơjiâng ƀă thăm achê, rŭm môi tuăn, tơrŭm pơla khu mô đô̆i kong pơlê ƀă Khu pơkuâ khôp Phop Việt Nam kong pơlê; mơnhông hnoăng dêi Khu pơkuâ khôp Phop Việt Nam kong pơlê Lâm Đồng tung tơdroăng mơjiâng ƀă gâk kring Tơnêi têa.

Ing mê, kum kring vế tơniăn cheăng kal kí, rak tơniăn pơlê pơla ƀă mơnhông mơdêk cheăng kâ, mơhno túa lĕm tro, rêh ối pơlê pơla tung lâp kong pơlê’’.

Pơtối mê, tơdroăng xiâm tơrŭm hneăng hơnăm 2021 – 2025, mê cho: Tơbleăng tơdroăng cheăng lêng ƀă kring vế ăm mâu ƀok Phop, kuăn khôp Phop; tối tơbleăng troăng hơlâ dêi Đảng, luât dêi Tơnêi têa, tơdroăng cheăng lêng, gâk kring, mơhno troăng tơmiât pêi pro ăm mâu ƀok phop, jâ phop, kuăn khôp phop ƀă hía hé. Tơrŭm pơtâng tối, mơhnhôk droh rơtăm cho kuăn ‘nĕng kuăn khôp phop pêi pro kơtăng tiô Luât pro mô đô̆i. Tơrŭm tơkŭm po tối ‘na tơdroăng nếo ai vâ mâu ƀok phop, jâ phop, kuăn khôp phop plĕng nhên, môi tuăn tơplâ mơdât mâu tơdroăng pơtâng tối ki ôh tá tro, ki pêi pro dêi mâu ngế ki kơneăm tơnêi têa, mơngế tơtrâ pro pơxúa mâu tơdroăng tơdjâk troh khôp phop vâ ‘nhê tơnêi têa.

Tơkŭm po ăm mô đô̆i lo lăm pơtâng tối kum kuăn pơlê, vâi krâ kuăn khôp Phop kơpong hơngế hơngo xăm kơklêa, kơdroh kơtiê. Tơkŭm po trâm mâ, kơ-êng, rơkâu klăng hâi leh kân dêi Khu lêng ƀă Khu khôp Phop. Tơrŭm pêi pro châ tơ-ƀrê mâu tơdroăng môi tiah mơjiâng pro “Hngêi tuăn pâ khu lêng – kuăn pơlê’’, “Hngêi rŭm môi tuăn” ăm mâu kuăn khôp Phop ai tơdroăng rêh ối pá puât, mâu hngêi mơhno túa lĕm tro, tơ’noăng ivá a mâu tíu khôp dêi Khôp Phop.

Ƀok Phop Thích Than Tân – Kăn pơkuâ tơdroăng khôp Phop Việt Nam kong pơlê Lâm Đồng mơnhên. Khu pơkuâ khôp Phop Việt Nam kong pơlê kô pêi pro tơdâng tơ’mô, tŭm têk mâu tơdroăng xiâm tơrŭm ing râ kong pơlê troh râ tơring. Kuăn khôp Phop xuân hbrâ môi tuăn, tŏng kum kăn ƀô̆, mâu mô đô̆i kong pơlê pêi pro mâu tơdroăng tung ivá kâi pêi.

Đăi tă Nguyễn Công Anh – Phŏ pơkuâ Kal kí Kuân khu 7 hiăng kheăn kơdeăn tơdroăng xiâm tơrŭm; tơdrêng amê, mơnhên Khu xiâm pơkuâ lêng kong pơlê Lâm Đồng cho môi tung mâu tíu pêi cheăng ki djâ troăng ahdrối tung pêi pro tơdroăng xiâm kố a Kuân Khu 7. Xuân akố, pakĭng tơdroăng tối mâu hnoăng cheăng kal pêi klêi kơ’nâi kĭ tơkêa, Phŏ pơkuâ kal kí Kuân khu 7 tối nhên  tơdroăng kal pêi tơtro tơdroăng pơtâng tối vâ mơnhên tâ mê nếo hnoăng ƀă tơdroăng ki tơrŭm pơla khu mô đô̆i ƀă Khu khôp Phop a peăng hdroh Tây Nguyên.

Jâ Phạm Thị Phúc, Kăn pơkuâ pơtâng tối mơhnhôk kuăn pơlê kơvâ cheăng Đảng kong pơlê tối tơdroăng ki phiu ro ƀă loi tơngah tung tơdroăng kĭ tơkêa tơdroăng tơrŭm pêi cheăng pơla Khu pơkuâ cheăng lêng kong pơlê ƀă Khu pơkuâ tơdroăng khôp Phop Việt Nam kong pơlê Lâm Đồng. Pói tơngah tơdroăng tơrŭm kô rak krá tơniăn tâ mê nếo tung tơrŭm cheăng pơla khu lêng – kuăn pơlê, mơnhông hiâm mơno rŭm môi tuăn hdroâng mơngế.

Mê cho xiâm kối vâ pơtối pêi pro tơdroăng “Pơtâng tối kuăn pơlê rơkê” ƀă “Pơtâng tối kuăn pơlê rơkê tung mơjiâng thôn pơlê nếo”. Khu lêng ƀă Khu khôp Phop kô pơtối rơtế vâ kum pêi pro châ tơ-ƀrê mâu tơdroăng tâ phĭu rak xo Kăn teăng mâ Kuô̆k hô̆i hneăng má V ƀă kăn teăng mâ Hô̆i đong kuăn pơlê mâu râ hneăng hơnăm 2021 – 2026 la ngiâ.

Hlá tơbeăng Lâm Đồng

A Sa Ly tơplôu ƀă tơbleăng