VOV4.Sêdang - Hlo ôh tá tơniăn pá vâ ‘nâi hdrối dêi pơreăng COVID-19, khu lêng Mố đô̆i gak tơkăng kong Kon Tum nếo châ pơtroh tơ’nôm khu lêng vâ hbrâ mơdât mâu ngế ki tơkâ luâ troăng tơkăng kong ôh tá tơniăn a péa to troăng tơkăng kong ki tơdjêp pơla Lếo ƀă Kul. Tiah mê, ai 8 to Đông mố đô̆i gak tơkăng dêi kong pơlê Kon Tum châ pơtroh tơ’nôm vâ chê 100 ngế sih quan, khu lêng ƀă kuăn pơlê ki rơkê ối tung Khu pơkuâ ngăn lêng kong pơlê.

Khu lêng Mố đô̆i gak tơkăng kong hnê tối thế hbrâ mơdât pơreăng COVID-19 ăm tơmối a kơpong tơneăn tâp hdró Việt Nam – Lếo – Kul

Klêi kơ’nâi tơdah xo khu lêng ki pơtroh, Khu pơkuâ ngăn mố đô̆i gak tơkăng kong kong pơlê Kon Tum hiăng tơkŭm hnê hriâm ‘na tơdroăng a tíu tơkăng, tơdroăng pơreăng COVID-19 a Lếo ƀă Kul, tơdrêng amê hnối séa ngăn kơtăng nhên hnoăng cheăng dêi kăn ƀô̆, lêng Khu pơkuâ ngăn lêng kong pơlê tung pơla pơtroh ăm 8 to Đông mố đô̆i.

Khu pơkuâ ngăn mố đô̆i gak tơkăng kong dêi kong pơlê Kon Tum ăm ‘nâi, kăn ƀô̆, lêng a troăng tơkăng xŏn lối 292 km ki tơdjêp pơla Lếo ƀă Kul xuân đi đo châ tơdroăng ki tơmâng ngăn, mơhnhôk tá hiâm mơno liăn ngân tung pơla pêi hnoăng cheăng péa tơdroăng rak ngăn tíu tơkăng kong ƀă hbrâ mơdât pơreăng COVID-19.

Katarina Nga tơplôu ƀă tơbleăng