VOV4.Sdang - Kơxê lơ 12/1, Vi ƀan kong pơlê Lâm Đồng tơkŭm po tơdroăng tơpui tơno ƀă pơ-ô pơ-eăng khu ngế tê mơdró, khu tê mơdró ki rơkê. Hên tơdroăng pá puât, tơvâ tơvân tung tơdroăng pêi kâ, tê mơdró châ mâu khu tê mơdró pơkâ ƀă pâ thế kong pơlê tơmâng tah lôi. A roh trâm mâ tơpui tơno, khu râ kăn pơkuâ kong pơlê Lâm Đồng tối tơbleăng, mơhé tơdjâk dêi pơreăng kân COVID-19, laga tơdroăng cheăng kâ – rêh ối pơlê pơla 9 khế apoăng hơnăm 2021 dêi kong pơlê xuân châ tơƀrê hên.

Tâi tâng roh tơpui tơno dêi khu tê mơdró ƀă khu râ kăn pơkuâ Vi ƀan kong pơlê Lâm Đồng

Châ tơƀrê kố ai tơdroăng veăng kum kân dêi khu ngế tê mơdró ƀă lối 11.000 khu tê mơdró tung kong pơlê. Vâ tah lôi mâu tơdroăng pá puât, rak  tơniăn pêi kâ kâi trâng ƀă pơreăng kân, mâu ngế tê mơdró hiăng pơkâ, pâ thế ƀă khu râ kăn pơkuâ kong pơlê Lâm Đồng hên tơdroăng ki kal tơmâng tah lôi. Ki xiâm cho tơdroăng pơkâ thế kơdroh liăn tơkâ hngêi arak liăn; ăm phep nâp liăn ƀaoh hiêm pơlê pơla, ƀaoh hiêm khăm pơlât hrá tung pơla 6 khế; séa ngăn kơdroh nâp liăn mung tơnêi; tŏng kum khu tê mơdró châ achê ƀă pêi pro mâu tơdroăng tơkêa bro pơ’lêh kih thuât kơxô̆ vâ rĕng xúa tung pơkuâ, tê tơmeăm khoăng.

A Sa Ly tơplôu ƀă tơbleăng