VOV4.Sedang -  Hâi tĭng, lơ 23/5 la ngiâ, kuăn pơlê dêi kong pơlê Dak Nông kô pêi pro hnoăng cheăng lăm tâ phĭu a 680 kơpong tâ phĭu. Kum ăm tơdroăng kal kố, Kŏng ti on tơhrik Dak Nông hiăng pêi pro hên troăng tơniăn mơ’no on tơhrik tơniăn, đi đo, tơniăn hdrối, tung ƀă kơ’nâi hâi tâ phĭu.

Kơmăi mơ’no on tơhrik ki hbrâ dêi Dak Nông

Cho kong pơlê tíu tơkăng kong ai ƀăng deăng kân rơdâ, troăng kơxái on tơhrik ki hên ối a mâu kơpong tơnêi rơnâk ngo ngối, mơhé ti mê, mâu khu pơkuâ on tơhrik a Dak Nông hiăng tơkŭm po pêi pro séa ngăn rêm hneăng, kơhâi, kơmăng, ki rơhêng vâ tối cho a mâu troăng kơxái on tơhrik tơ’lêi tơ’nhê.

Séa ngăn kơmăi mơ’no on tơhrik ăm kơpong tâ phĭu a cheăm tơkăng kong Quảng Trực, Tuy Đức.

Tơdrêng amê, mâu tôh, khu hiăng hbrâ tŭm kế tơmeăm khoăng hbrâ mâu kế tơmeăm vâ rơnêu drêng on tơhrik tơ’nhê. Mâu tíu cheăng xuân hiăng pơtroh mơngế gâk pêi cheăng, kơmăi mơ’no on tơhrik ki hbrâ hdrối a mâu kơpong tâ phĭu.

Ƀă tơdroăng ki hbrâ nhên, on tơhrik Dak Nông loi tơngah kô tơniăn mơ’no ăm on tơhrik, kum tung tơdroăng châ tơƀrê dêi hâi phiu ro tâ phĭu dêi tơnêi têa.

A Sa Ly tơplôu ƀă tơbleăng