VOV4.Sêdang - Hâi lơ 16/4, a pơlê kong kơdrâm Ƀuôn Ma Thuột, kong pơlê Dak Lak, Khu ngăn cheăng ‘na Khu pêi cheăng tơrŭm ƀă mơnhông thôn pơlê ối tung Khu xiâm ngăn chiâk deăng ƀă mơnhông thôn pơlê tơkŭm po Rôh hôp tơbleăng hnoăng cheăng hơnăm 2021 kơvâ cheăng kâ khu pêi cheăng tơrŭm ƀă mơnhông thôn pơlê ƀă hên troăng hơlâ ki châ pơkâ mơ’no tung pơla ai pơreăng ai Covid-19 tá hâi tơniăn ƀă mâu tơdroăng tơkêa tê mơdró tơniăn krê pơxiâm châ xêt khât.

Khu pêi cheăng tơrŭm pêi chiâk deăng hơ’lêh nếo vâ mơnhông

Tối tơbleăng a rôh po hneăng hôp, riân troh tâi khế 3/2021, lâp tơnêi têa ai vâ chê 17.600 khu pêi cheăng tơrŭm ƀă 68 khu tơrŭm pêi cheăng tung kơvâ pêi chiâk deăng. 83% kơxô̆ khu pêi cheăng tơrŭm pêi chiâk deăng tơƀrê, tâk 50% tâng vâ pơchông ƀă hơnăm 2015. Kơxô̆ liăn châ xo dêi khu pêi cheăng tơrŭm pêi chiâk deăng châ lối 380 rơtuh liăn tung môi hơnăm. Poâ Trần Thanh Nam, kăn xiâm phŏ ngăn chiâk deăng ƀă mơnhông thôn pơlê pơkâ thế mâu kong pơlê pơtối mơnhông cheăng kâ tơrŭm, mơnhông pêt mâu kế tơmeăm tiô troăng ki hên kơvâ, hên cheăng tơtro ƀă tơdroăng cheăng kâ kơchô mơdró, hơ’lêh túa pơkâ mơjiâng tê mơdró, vâ rế hía rế mơdêk ivá tơxup tơbriât ăm mâu kế tơmeăm ki kố.

Katarina Nga tơplôu ƀă tơbleăng