VOV4.Sêdang - Hâi lơ 17/3, a Hà Nội, Khu pơkuâ cheăng Đảng kơvâ cheăng lêng Tơnêi têa, Khu xiâm pơkuâ lêng tơkŭm po trâm mâ mâu ngế hơnăm ối nếo kơhnâ rơkê tung tâi tâng khu lêng hơnăm 2020. Đăi tươ̆ng Ngô Xuân Lịch, Kăn phŏ pơkuâ hnê ngăn cheăng Đảng kơvâ cheăng lêng Tơnêi têa, Ngế xiâm pơkuâ lêng veăng ƀă pơkuâ roh trâm mâ.

Hơnăm 2020, tơdroăng pêi cheăng Đoân Droh rơtăm ƀă tơdroăng droh rơtăm châ po rơdâ tŭm têk tung khu lêng ƀă hên tơdroăng xiâm, troăng pêi ki rơkê. Rơxông ối nếo khu lêng hiăng mơ-eăm tah lôi mâu tơdroăng pá puât, mơ-eăm tơ’noăng, djâ troăng ahdrối pêi pro ƀlêi trâng hnoăng cheăng kal kí dêi kơ koan, tíu cheăng.

Hơnăm 2020, khu râ kăn kơpêng pơtối kheăn kơdeăn vâ chê 2 rơpâu ngế ki kơhnâ rơkê: ối tung khu pơkuâ cheăng Đảng kơvâ cheăng lêng tơnêi têa – Khu xiâm pơkuâ lêng kheăn kơdeăn 313 ngế hơnăm ối nếo kơhnâ rơkê. A roh trâm mâ, Đăi tươ̆ng Ngô Xuân Lịch hiăng diâp pơkâ to kơlŏng kăn lêng hdrối hâi khế pơkâ ƀă rah xo khu lêng ki rơkê ƀă 4 ngế châ inâi hơnăm ối nếo kơhnâ rơkê tung tâi tâng khu lêng hơnăm 2020.

A Sa Ly tơplôu ƀă tơbleăng