VOV4.Sêdang - Khu pơkuâ ngăn Đảng hiăng pêi cheăng ƀă Vi ƀan tâ phĭu kong pơlê Lâm Đồng ‘na tơdroăng ki pêi pro hnoăng cheăng pôk kăn Kuô̆k hô̆i hneăng má 15 ƀă kăn Hô̆i đong hnê ngăn rêm râ kong pơlê Lâm Đồng hơnăm 2021 – 2026. Troh nôkố, hnoăng cheăng tâ phĭu rêm râ sap ing kong pơlê troh cheăm, bêng hiăng pêi pro tro tơdroăng pơkâ.

Lâp kong pơlê Lâm Đồng hiăng pêi pro tơbrê tơdroăng tơkêa rôh má 2, ing mê, môi tuăn mâu inâi dêi 13 ngế ki tơbriât pro kăn Kuô̆k hô̆i, 131 ngế tơbriât cheăng tung Hô̆i đong hnê ngăn kong pơlê, kăn Hô̆i đong hnê ngăn râ tơring, pơlê kong kơdrâm ai 800 ngế, râ cheăm, bêng, pơlê kân ai 6.624 ngế.

 Tơdroăng ki xo tơdroăng ki tơpui tối ing kuăn pơlê sap ing tíu ki rêh ối ƀă ngế ki tơbriât vâ pro kăn Kuô̆k hô̆i ƀă kăn Hô̆i đong hnê ngăn rêm râ dế châ tơkŭm pêi pro kơtăng, tro tiô pơkâ. Kăn pơkuâ ngăn Đảng kong ơlê Lâm Đồng pơchân kal pơtối mơdêk rĕng tơdroăng pêi pro ki pơtối dêi hnoăng cheăng tâ phĭu; pơtối mơdêk hnoăng cheăng tối tơbleăng trâu hơngế vâ kuăn pơlê hlê nhên hnoăng cheăng ki kal dêi rôh tâ phĭu.

Nga tơplôu ƀă tơbleăng