VOV4.Sêdang - Klăng leh tơbâ 80 hơnăm Hâi mơjiâng mơngế hơnăm hiăng krâ Việt Nam lơ 6/6, kơxê lơ 4/6, Vi ƀan kong pơlê Dak Nông hiăng troh lăm pôu, diâp hơvĭng  reăng ƀă rơkâu Khu pơkuâ mơngế hơnăm hiăng krâ kong pơlê Dak Nông. Vi ƀan kong pơlê kheăn kơdeăn mâu tơdroăng veăng kum dêi khu kăn ƀô̆, khu pơkuâ mơngế hơnăm hiăng krâ tung pơla kố nah, ôh tá xê to djâ troăng ahdrối ăm kuăn muăn hriâm tâp tung rêm kơvâ cheăng, mê ối mơhno troăng pêi, pleăng hnoăng cheăng mơjiâng kong pơlê rế hía rế mơnhông mơdêk. Vi ƀan kong pơlê pói vâ khu kăn ƀô̆, mâu ngế hơnăm hiăng krâ ivá mo sêi, pơtối tăng troăng pêi, pleăng hnoăng cheăng, ki má lối kơhnâ veăng tung tơdroăng “Hơnăm hên tuăn tơmiât rơkê, djâ troăng ahdrối tung tơdroăng mơjiâng ƀă gak kring Tơnêi têa’’.

A roh trâm mâ, Kăn hnê ngăn Khu mơngế hơnăm hiăng krâ kong pơlê mơnê tơdroăng ki tơmâng dêi khu râ kăn pơkuâ kong pơlê tung tơdroăng rak ngăn ăm mâu ngế hơnăm hiăng krâ. Khu pơkuâ mơngế hơnăm hiăng krâ kong pơlê pơtối mơnhông hiâm mơno, rơtế ƀă kong pơlê tung mâu tơdroăng tơ’noăng pâ nhuô̆m tơnêi têa, ki má lối hnê hriâm vâi hdrêng.

A Sa Ly tơplôu ƀă tơbleăng