VOV4.Sêdang - Kơxo lơ 26/4, pôa Phan Diễn – Kăn hnê ngăn Khu râng liăn pơlê pơla hbrâ ví kong prâi pro ôh tá tơniăn (ối tung Kơ koan xiâm pơkuâ loăng pơlái kong kế ƀă kong prâi – Đăi hok Tơnêi têa Hà Nội) pơkuâ djâ khu râ kăn hiăng ai roh pêi cheăng ƀă kong pơlê Gia Lai ‘na mâu  tơdroăng xiâm tung pơkuâ, gak kring ƀă mơnhông pêt kong. Tơbleăng a roh pêi cheăng ăm hlo, 5 hơnăm hiăng hluâ, ƀăng deăng kong a Gia Lai châ lối 25 rơpâu ha. Troh mơ’nui hơnăm 2020, ki xâp rơngiâp dêi kong a kong pơlê kố châ 46,7%; tơdroăng pơkuâ, gak ngăn kong, hbrâ mơdât on chếo kong châ tơmâng hnê mơhno.

Khu râ kăn pêi cheăng Khu pơkuâ râng liăn pơlê pơla hbrâ ví kong prâi pro hơ’leh pêi cheăng a kong pơlê Gia Lai

Xông tơpui a roh pêi cheăng, pôa Phan Diễn tối ƀă kong pơlê ‘na mâu  tơdroăng pá puât dế trâm. Khu râng liăn pơlê pơla hbrâ ví kong prâi pro ôh tá tơniăn kô chiâng kum kong pơlê mơjiâng tơdroăng tơkêa bro tŏng kum ăm kuăn pơlê a mâu tíu ki pêt loăng kân xŏn teăng loăng ki kŭn kếo xo rĕng; lơ pêt tơvât tung kơdrum kơphế vâ mơdêk pêi lo liăn, rế mơdêk tơdroăng tât khía ăm tơnêi. Laga, kong pơlê xuân kal ai troăng hơlâ tŏng kum tăng tơmeăm kâ ăm kuăn pơlê tung pơla loăng ối kŭn vâ vâi hmiân tuăn rak ngăn, gak ngăn kong ƀă rak ngăn ton kong ki vâ mơjiâng pro kế tơmeăm khoăng.

A Sa Ly tơplôu ƀă tơbleăng