VOV4.Sêdang - Mâu hơnăm achê pơla kố tung roh apoăng hơnăm nếo, môi tơdroăng cheăng dêi Khu râng liăn gak ngăn ƀă mơnhông pêt kong dêi kong pơlê Kon Tum châ kuăn pơlê kheăn kơdeăn hôm ‘nâng, mê cho Tơdroăng pơtâng tối ‘’Rơtế veăng kum o troh hngêi trung’’. Hơnăm kố tung pơla pơreăng COVID-19, tơdroăng kố châ Khu râng liăn pêi pro môi tiah lâi ƀă mâu hnoăng cheăng klâi kô châ Khu râng liăn pêi pro sap ing kố troh mơ’nui hơnăm. Mâu tơdroăng kố kô ai tung roh tơpui tơno kơ’nâi kố dêi ngế chêh hlá tơbeăng ƀă pôa Hồ Thanh Hoàng, Kăn pơkuâ Khu râng liăn rak ngăn ƀă mơnhông pêt kong dêi kong pơlê. Pó vâi krâ nhŏng o ƀă pú hmâ kô tơmâng!

(Băng trao đổi)

-Ô pôa, tung mâu hơnăm hiăng hdrối mê hiá nah môi tơdroăng a roh apoăng hơnăm nếo dêi Khu râng liăn châ kuăn pơlê kheăn kơdeăn păng ‘nâng, mê cho tơdroăng pơtâng tối “Rơtế veăng kum o troh hngêi trung’’. Hơnăm kố, tung pơla ai pơreăng COVID-19, Tơdroăng kố hiăng ai pơ’lêh ‘na troăng pêi pro môi tiah lâi?

Pôa Hồ Thanh Hoàng: ‘’Xuân môi tiah mâu hơnăm hdrối, hơnăm 2021 Khu râng liăn rak ngăn ƀă Mơnhông pêt kong kong pơlê Kon Tum mơjiâng pơkâ pơtâng tối ‘’Rơtế veăng kum o troh hngêi trung hơnăm 2021’’, pêi pro tơdroăng pơtâng tối, tơbleăng troăng hơlâ mơhá hnoăng liăn rak ngăn ƀă mơnhông pêt kong ing tơdroăng pơtâng tối châ tơƀrê ing rơ’jíu, um tơvi, măng Internet, mê cho hlá mơ-éa chêh hok tro ƀă muâk ai in tơdroăng pơtâng tối troăng hơlâ mơhá liăn rak ngăn kong, vâ pơtối mơdêk hlê plĕng dêi mâu vâi o hok tro, thái cô, hngêi trung ƀă mâu nôu pâ tung kơpong ki ai xo rak ngăn ƀă mơnhông pêt kong ‘na pơkuâ, rak ngăn kong hlối troăng hơlâ mơhá hnoăng liăn rak ngăn kong; cho kông tơdjêp djâ tơdroăng kal pơtâng tối troh tâi tâng kuăn pơlê tung kơpong châ xing xoăng ăm rak ngăn kong.

Hơnăm kố tung pơlê pơreăng COVID-19 xông tâ tú ó, Khu râng liăn mơhá hnoăng rak ngăn ƀă Mơnhông pêt kong kong pơlê Kon Tum tơrŭm ƀă khu ki mơ’no liăn rôe pơcháu kơxop hlá mơ-éa chêh ƀă muâk pơtâng tối ăm Khu pơkuâ mâu hngêi trung hriâm ƀă tơdroăng ki châ hlo dêi kăn teăng mâ Vi ƀan cheăm, pơlê kân; Khu kăn pơkuâ hngêi trung ai hnoăng xing xoăng ăm hlá mơ-éa chêh, muâk ăm mâu vâi o hok tro tiô tro kơxô̆, kơlo dêi Khu râng liăn mơhá hnoăng rak ngăn ƀă mơnhông pêt kong kong pơlê pơcháu’’.

-Pôa hôm chiâng tối ‘na tơdroăng pêi Tơdroăng pơtâng tối ‘’Rơtế veăng kum o troh hngêi trung’’ mê Khu râng liăn mơhá hnoăng rak ngăn ƀă mơnhông pêt kong kong pơlê Kon Tum nếo pêi pro roh apoăng hơnăm hriâm nếo?

Pôa Hồ Thanh Hoàng: ‘’Pêi pro tiô Pơkâ pơtâng tối ‘’Rơtế kum o troh hngêi trung hơnăm 2021’’, tung khế 7 hơnăm 2021, Khu râng liăn mơhá hnoăng rak ngăn ƀă mơnhông pêt kong kong pơlê Kon Tum hiăng tơrŭm ƀă khu ki in mâu tơdroăng tơbleăng ‘na troăng hơlâ mơhá hnoăng liăn rak ngăn ƀă mơnhông pêt kong; pơkuâ rak ngăn kong in a kơtôu dêi 600.000 kơxop hlá mơ-éa hriâm hok tro ƀă 5.000 to muâk truâ ko ƀă pơcháu ăm 169 hngêi trung a 76 cheăm, pơlê kân tung 10 tơring, pơlê kong kơdrâm dêi kong pơlê Kon Tum. Mâu tơdroăng vâ tối tơbleăng a kơxop hlá mơ-éa hriâm ƀă muâk truâ ko tơxâng tiô pơkâ pơtâng tối pơkâ mơ’no ƀă tơdroăng pói vâ, tơkôm dêi mâu hngêi trung hriâm lăm kum mâu vâi o ai kơxop hlá mơ-éa hriâm’’.

-Ô pôa! Tung mâu khế pơtối nếo dêi hơnăm, Khu pơkuâ râng kơxô̆ liăn mơhá hnoăng rak ngăn ƀă mơnhông pêt kong kong pơlê Kon Tum kô tơkŭm tung tơdroăng po rơdâ, pêi pro mâu tơdroăng xiâm ki lâi, ô pôa?

Pôa Hồ Thanh Hoàng: ‘’Tung mâu khế pơtối dêi hơnăm 2021, Khu pơkuâ râng liăn mơhá hnoăng rak ngăn ƀă Mơnhông pêt kong kong pơlê kô tơkŭm pêi pro mâu tơdroăng cheăng xiâm kơ’nâi kố:

Má môi, cho pơtối xo hdrối kơxô̆ liăn mơhá hnoăng rak ngăn ƀă mơnhông pêt kong hơnăm 2021 ăm mâu khu pơkuâ kong cho khu pú hên, mâu Vi ƀan mâu cheăm, pơlê kân.

Má péa, cho pơtối pơtroh kơxô̆ liăn tŏng liăn mơjiâng Troăng pơkuâ kong krá tơniăn ăm mâu khu pơkuâ kong ki ê ing kơxô̆ liăn pơkuâ hơnăm 2021 dêi Khu pơkuâ râng kơxô̆ liăn rak ngăn ƀă mơnhông pêt kong kong pơlê tiô Pơkâ kơxô̆ 1054 hâi lơ 27 khế 10 hơnăm 2020 dêi Vi ƀan kong pơlê.

Má pái, cho pơtối pêi pro Pơkâ pơtâng tối kơxô̆ 03 hâi lơ 20 khế 1 hơnăm 2021 dêi Khu pơkuâ râng kơxô̆ liăn mơhá hnoăng rak ngăn ƀă mơnhông pêt kong.

Má pŭn, cho pêi pro mâu hnoăng cheăng tiô Mơgêi dêi pôa Nguyễn Hữu Tháp – Kăn phŏ hnê ngăn Vi ƀan kong pơlê, Kăn hnê ngăn Hô̆i đong pơkuâ Khu pơkuâ râng kơxô̆ liăn mơhá hnoăng rak ngăn ƀă mơnhông pêt kong kong pơlê a Tơbleăng kơxô̆ 1890 hâi lơ 1 khế 7 hơnăm 2021 dêi Ƀơrô Vi ƀan kong pơlê ‘na tơdroăng pơkuâ, xúa kơxô̆ liăn mơhá hnoăng rak ngăn ƀă mơnhông pêt kong ki teăng tung kong pơlê.

Má tơdrốu, cho pơtối tơkŭm po séa ngăn tơdroăng pơkuâ, xúa kơxô̆ liăn mơhá hnoăng rak ngăn ƀă mơnhông pêt kong hơnăm 2020 dêi mâu Vi ƀan mâu cheăm, pơlê kân ki ê nếo.

Má tơpah, cho mơjiâng pơkâ, tối hdrối kơxô̆ liăn séa ngăn, mơnhên ƀăng kong châ mơhá hnoăng liăn rak ngăn ƀă mơnhông pêt kong hơnăm 2021 dêi mâu khu pơkuâ kong cho khu pú hên; kăn pơkuâ kong cho rơpŏng, ngế krê, pơlê pơla thôn ƀă mâu Vi ƀan cheăm, pơlê kân ối pơkuâ rak ngăn kong ƀă kĭ mơnhên lơgât mơhá hnoăng liăn rak ngăn ƀă mơnhông pêt kong.

Má tơheăm, cho tơrŭm ƀă Kơ koan xiâm rak ngăn kong, mâu Tíu rak ngăn kong tơring, pơlê kong kơdrâm mơjiâng lơgât dêi mâu khu pơkuâ kong châ mơhá hnoăng liăn rak ngăn ƀă mơnhông pêt kong; tơkŭm séa ngăn, mơnhên ƀăng kong châ mơhá hnoăng liăn rak ngăn ƀă mơnhông pêt kong hơnăm 2021 dêi mâu khu pơkuâ kong cho khu pú hên, Vi ƀan mâu cheăm ƀă mâu rơpŏng, ngế krê, pơlê pơla kuăn pơlê thôn pơlê.

Má tơchên, cho hnê mơhno mâu tíu ki xua mơngế rak ngăn ƀă mơnhông pêt kong kĭ pơkâ mơhá liăn hnoăng rak ngăn ƀă mơnhông pêt kong hơnăm 2022.

Má môi chât, cho pơtối mơhnhôk mâu tíu cheăng ối chĕn kơxô̆ liăn mơhá hnoăng rak ngăn ƀă mơnhông pêt kong, kơxô̆ liăn pêt kong teăng nâp liăn tiô pơkâ. Ƀă mâu tíu ôh tá pêi tiô pơkâ nâp liăn rak ngăn ƀă mơnhông pêt kong, liăn rơkâ hrá nâp tiô pơkâ mê pơkâ râ kăn ai hnoăng pơxâu phâk tiô pơkâ nôkố.

Má môi chât môi, cho tơbleăng mơgêi tơdroăng mơhá hnoăng liăn rak ngăn ƀă mơnhông pêt kong ƀă pêt kong ki nếo tung ƀăng kong ton hơnăm 2021, mơjiâng pơkâ pêi pro hnoăng cheăng hơnăm 2022.

-Ê! Mơnê kơ pôa Hồ Thanh Hoàng, Kăn râng liăn mơhá hnoăng rak ngăn ƀă mơnhông pêt kong dêi kong pơlê Kon Tum hiăng mơdoh chôu tơpui tơno ƀă ngin!

A Sa Ly tơplôu ƀă tơbleăng