VOV4.Sêdang - Kơxo lơ 10/6, Grup pơkuâ Phongsubthavy dêi kong têa Lếo hiăng troh kơ koan teăng mâ Việt Nam a kong têa Lếo diâp mâu tơmeăm khăm pơlât ƀă liăn mâ kơnâ 1 rơtuh dollars tŏng kum Chin phuh ƀă kuăn pơlê Việt Nam hbrâ mơdât pơreăng COVID 19. Teăng mâ Chin phuh ƀă kuăn pơlê Việt Nam, pôa Nguyễn Bá Hùng, Kăn teăng mâ Việt Nam a kong têa Lếo hiăng tơdah liăn ngân, tơmeăm khoăng ki pơxúa ing Grup pơkuâ Phongsubthavy, xua pôa Phongsavanh Senaphuan – Kăn hnê ngăn Grup diâp ăm.

Tung mê ai hên tơmeăm khoăng pơlât kơnâ 500 rơpâu dollars môi tiah 50 rơpâu kên pâng rơkong môh, 25 rơpâu kong kếo têa pơkeăng kơdê pơreăng, 1.000 plâ hmân ếo mơdât pơreăng, 200 xoăng koi pơlât mâu ngế tamo châi ƀă hía hé rơtế 500 rơpâu dollars liăn mâ tŏng kum Kơxô̆ liăn rôe vaccine xua pôa Phạm Minh Chính, Ngế pro xiâm hnê ngăn Chin phuh mơhnhôk pêi pro.

Pôa Nguyễn Bá Hùng, Kăn teăng mâ Việt Nam a kong têa Lếo hiăng tơdah liăn ngân, tơmeăm khoăng ki pơxúa ing Grup pơkuâ Phongsubthavy

Pôa Nguyễn Bá Hùng tối, tơdroăng tŏng kum kố mơhno tơdroăng rŭm tơrôa kân, tơdroăng rŭm môi tuăn, tơrŭm tŭm têk pơla péa tơnêi têa Việt Nam – Lếo.

A Sa Ly tơplôu ƀă tơbleăng